Princesse Liet-boec

Helena antwoort tot Paris [vertaling][editie]

Op de Stemme: alst beghint (Lief uytvercoren / lief triumphant)

Nochtans gheen thooren / my van u keert /
Wie sou hem stooren / te zijn begheert /
Maer tis te spade / nu ghy beghint
Hadt u genade / wat eer versint /
Ick haddet gewaecht / had ghyt gevraecht /
Doen ic was maecht / van duysenden bemint.

Al is u stede seer rijck vermaert
Grieken is mede / wel prijsen waert /
U beloften schoone / zijn wel verwacht
Maer u persoone / heeft meerder cracht /
Als ick mijn eer / wou stellen ter neer /
Sou Paris meer / dan Troyen sijn geacht.

Of ick u al minde / o edel prins /
So blaest den winde nae uwen wins
Die sou u drijven weer in u staet.
Wat soud my blyven / dan schand en smaet
Onse liefd en cost / maer zijn begost
Als ghy so most / vertrecken op der daet.

Ginck ick dan spoedich / mee in u lant
Een oorlooch bloedich / quam op de hant
Hoe wel ghy crachtich / u selven hiet
U aenschijn sachtich / en tuycht dat niet /
Laet andere staen / te veldewaert gaen /
Doet ghy voortaen dat Venus u ghebiet.

U Princelijck wesen / U schoon aenschijn
Wort seer ghepresen / en oock van mijn
Die u begheeren / zijnder wel veel /
Van grooter eeren / schoon / rijck en eel /
Dus later Heleen / in rust / in vreen
Ghy crijght wel een / u weerdich tot een deel.