Pseudo-Bonaventura-Ludolfiaanse leven van Jesus

Hoe hi sijn jongheren openbaerde beslotenre doeren. Dat .xlvi. capittel

Dese twe discipulen quamen altehants weder in Iherusalem ende vonden die ander discipulen al vergadert sonder Thomas ende vertelden hem dese dijnghen ende hoerden daer te gader, dat hi verresen was ende Symon Petrus gheopenbaert hadde. Doe ghinc onse Heer mit beslotenen doeren tot hem in, ghecleet mit witten clederen der glorien ende der nyheit sijnre verrisenisse, ende stont int middel onder hem ende seide: "Vrede si mit u." Die jonghers vielen neder ter aerden ende baden ghenade van dien dat si hem ghelaten hadden, ende onse Heer vergaf hem hoer sonden. Ende hi stont vriendelijc mit hem ende toent hem sijn hande ende voete ende sijn side, ende opent hem hoer verstandenisse, dat si bekennen souden ende verstaen sijn verrisenis ende vraecht hem, of si yet teten hebben. Doe gaven si hem een stuc van enen ghebraden vissche ende een hoenich roete, ende hi at voer hem allen ende blies in hem ende gaf hem den Heilighen Gheest. Waer bi die discipulen verblijt worden, want si onsen Heer hadden ghesien, ende verbliden hem voer hem, die daer tevoren so bedroeft waren. Och, hoe

[fol. 178r]

ghaern si hem die spise gaven, dat hi eten soude! Ende hoe trouwelijc dienden si hem ende hoe blidelike stonden si bi hem! O, wat huusken was dit, ende hoe ghenuechlijc wast daer in te wonen! Sich, hoe alle dese vol bliscappen waren ende vrouden. Ende sich hier nu een groet Paesschen. Mar luttel tijts bleef hi daer, want het was thants avont. Ende bi aventuren si dwonghen hem daer een luttel langher te bliven ende baden hem, dat hi so schier niet en wech en ghinghe, ende dat en mishaghede onsen Heer niet, want hi ghehouden wil sijn van ons, als voerseit is. Ten lesten benediede onse Heer hem allen ende scheide van hem. Ende die jongheren bleven doe hongherich ende dorstich van onsen Heer, want si sijns soe veel pleghen te ghebruken, ende riepen hem dicwile weder te comen mit suchten ende mit begheerten.

Nu hebstu ghesien, hoe dicwijl huden Paeschen gheweest heeft, want alle dese openbaringhen in Paesch daghe gheschiet sijn. Mar du hebste bi aventuren dese blide Paesschen ghehoert ende niet ghevoelt, ende dat comet daer bi, wanttu bi aventuren in deser passien gheen mededoghen ghehadt en hebste. Want ic ghelove: constu inder passien mede liden, ende hadstu dijn

[fol. 178v]

herte vergadert ende niet ghespreydet tot tijtliker sorchvoudicheit, dattu tot elker tijt van dat voerseit is een Paesschen bevoelen soudste. Ende dat mochte di elkes Sonnendaghes gheschieden, waert dattu mit gheheelre herten des Vridaghes ende des Saterdaghes di oefenste inder passien ons Heren. Want als die apostel seit: "Ist dat wi ghesellen sijn der passien, wi sullen ghesellen sijn des troests."

Onse Heer keerde doe weder totten heilighen vaders, die voer hem niet ledich, mar mit groter vrouden ende bliscoppen ende love stonden, want die heilighe vaders ende die enghelen stonden voer hem in love ende songhen waerdelijc, blidelijc ende devotelijc in groter jubilacien. Sich se nu mit bliscoppen aen ende verblijt di mit hem ende leer onsen Heer eren ende loven ende hem danc te spreken ende sine gaven te bekennen. Ende mit allen dinen aernste ende craften so pijn di tot dier glorien te comen, daer du altoes inden aensicht dijns Gods in dier edelre menichte inden love ende glorien bliven moghest.