ruyters Dese waren al totter hant des conincs, sonder die hi gestelt had in die bemuerde steden. Dese Iosephat had sonen, als Azariam, Iahihel, Sachariam Azariam, Michael, ende Saphitiam. Ende haer vader gaf hen allen grote menichte van siluer, gout, en grote renten, ende stercke bemuerde steden int landt van Iuda. Ende hi gaf Ioram ouer dat rijck, om dat hi de oudtste was. Als Ioram nv coninc. was so dede hi doden al sijn brueders metten sweerde, ende ooc zommige princen van Iuda Ende hi regneerden .viii. iaer. ende hi wandelde inden wegen van achab, en hi zondichde teghen den here, ende die dochter van achab was zijn wijf. Ende hi verliet den here den god sijns vaders, ende hi dede dat volck van Iuda in sonden vallen. Doe wert hem gesonden eenen brief van Helias daer in stont. Dit seyt die here die god dijns vaders Dauid. Want ghi niet en hebt gewandelt inden wegen dijns vaders Iosephat, ende hebt doen ouer treden dat volc van Iuda ende die inwoenders van Iherusalem, ende dat ghi geuolcht hebt dat huys van achab ende hebt verslagen dijn brueders ende de beste van dijns vaders huys, so sal god de here v, ende v volc, v huysvrouwen v kinderen, en al v goet, slaen met een grote plage. En god verwecte die Philisteen, en die van Arabien ende quamen verdestrueren die steden van Iuda. ende si namen al dat goet, gout, ende siluer, dat sy vonden in des conincs huys, ende zijn huysvrouwen, ende kinderen, ende hi en behielt niet dan sinen ioncxsten sone Ioacham. Ende bouen desen wert Ioram geslagen met een onmenschelijcke plaghe inden buyck so dat sijn darmen verrotten, ende ghingen hem al af in corten tijt, so dat hi in sulc-
Auteursrechtvrij
