Der IX quaesten

¶Van Caym den eersten dootslagere

Als Adam ende Eua onse eerste ouderen wten aertschen paradijse veriaecht waren, ende gestelt waren om die aerde te arbeyden, so bekende adam sijn huysvrouwe Euam, ende si ontfinck een vruchte ende baerde haren sone Caym, ende hi was die eerste geboren opder aerden. Daer na baerdense sinen brueder Abel. Ende Abel was een scaepherder, ende Caym een ackerman Daerna gheuielt na veel ende lange dagen dat Caym den heere soude offeren gauen vanden vruchten der eerden. ende Abel offerde vanden eersten geboren ende vette lammerkens. Ende die heere sach op Abel, ende op sijn gauen. ende en sach op Caym niet noch op zijn gauen.

[fol. C1v]

Doe wert Caym toornich op sinen brueder. Doen seyde die heer, waerom sidi gram, hebdi wel ghedaen ghi sult wel hebben, hebdi ooc quaet ghedaen ghi sult dat terstont vinden. Doe seyde Caym tot Abel laet ons buyten gaen. Ende als si int velt waren. so stont Caym op tegen sinen brueder Abel, ende hi sloech hem doot. Doe sey die heere, Caym waer is v brueder abel, Ende hi antwoorde, ic en weets niet. ben ic bewaerder van mijnen brueder Abel. Doe seyde die here Caym wat heb di gedaen. Die stemme van dat bloet dijns brueders roept tot mi vander eerden Daerom suldi vermaledijt sijn op der eerden die haren mont opgedaen heeft te ontfangen dat bloet dijns brueders van uwer hant. Ende als ghi dye eerde sult arbeyden so salse v niet gheuen haer vruchten ende ghi sult vluchtich zijn opder eerden Doe seyde Caym totten heere Groter is mijn boosheyt dan dat ic mach verghiffenis vercrighen, daerom die mi sal vinden sal my dootslaen. Doe sey die herre, so niet want de Caym dootslaet sal seuen mael ghepinicht worden. Ende god stelde een teken in Caym, op dat die ghene die hem vinden soude, en soude hem niet dootslaen. Ende Caym is wtgegaen van dat aensicht des heeren na dat oosten in Eden. Ende Caym bekende sijn huysvrou ende si baerden Enoch ende doe timmerde hi een stadt dye hi noemde Enoch. Ende Enoch ghewan Irad. Irad ghewan Mauiael. Mauiael gewan Mathusalem Mathusalem ghewan Lamech. ende dye hadde twee huysvrouwen, die een was gheheeten Ada, ende die ander huysvrouwe heete Sella. Ada die baerde haren sone Iahel, ende hy was die vader van den ghenen die daer woenden inden tenten. Ende

[fol. C2r]

Ada baerde noch sinen brueder Tubal, ende was die eerste die op harpen ende orghelen speelde. Ende Sella sijn ander wijf baerde haren sone Tubalcaym, ende dese was een smit ende werckman van allen manieren van gout, siluer, coper, ende yser. Ende dese Lamech dode Caym onuersienlijck.