Der IX quaesten

¶Vanden verrader Iudas

In Iherusalem was een vrouwe geheten Borre, ende haer man was geheten Ruben. Dees liggende te samen op haer bedde hebbende gheselscap te gader na den staet des huwelijcx Ende corts daer na so viel de vrouwe Borre in slape ende haer droomde dat si had ontfangen een kint, welc kint soude sijn in sijn leuen die meeste moorder ende verrader vander werelt. Ende als si ontspranck wten slape so verteldese haren droom tot haren man Ruben. ende seyde Ick heb desen nacht een kint ontfanghen. welck sal wonderlijcke veel quaets doen in sijn leuen ende ist dat ic ontfangen heb, so weet ic wel dattet so sal

[fol. F3r]

sijn. Doe seyde Ruben haer man, sidi al sot dat ghi wilt ghelouen in dromen, segt doch daeraf niet meer Doe seyde Bore lieue man ic heb ontfanghen, ende werdic emmermeer verlost van desen kinde ghy sult mijnen droom waer vinden. Ende noch meer droomde mi dat hi gedoot had eens conincs sone. ende dat hi v ooc hadde ghedoot. ende dat hi my getrout had tot eenen wijue, ende dat hy vercocht hadde den verlosser van alder werelt den Ioden. Ende als Ruben dit hoorde van Bore sijnder huysvrouwe so was hi seer verwondert. Ende als dye ix. maenden om waren, ende den tijt der natueren volbracht was soe werdt si verlost van eenen ionghen sone den si Iudas dede heten. den si opvoede ende bi haer hielt tot dat hi een maent oudt was. Binnen welcken tijt Borre sijn moedere was altijt denckende ende ouerlegghende haren droome. maer sy en dorste hem niet doden door anxte ende sorghe dat yemant soude hebben moghen weeten. Ende si en dorsten oock niet houden noch opbrenghen door sorghe ende anxt diese van hem hadde, maer die vader ende moeder namen raet met malcanderen ende ten letsten leyden si dat kint in een vaetken ende settent soe op die zee ende lietent drijuen op die auentuere. Ende dye winden ende waghen dreuen hem voort tot dat hy quam an een eylandt dat Scharioth gheheeten was daer hi namaels bi geheten was Iudas scharioth.