Der IX quaesten

¶Hoe Pylatus sprack met Iudam, ende hoe hi hem begheerde tot sinen dienaer.

Des anderen daghes als Iudas tot Iherusalem gecomen was, so ghinc hi wandelen om die stadt te besiene.

[fol. G1r]

So quam hem int tghemoete die rechtere Pilatus, ende sach dat Iudas was een schoon ionck man, ende wel ghecleedt, ende bequaen om dienen inder heeren houe, so dat Pilatus Iudam ontboodt om bi hem te comen. Als nv Iudas voor Pilatum quam soe dede hi pilato sulcken reuerencye ende huesscheyt dat hem Pilatus heel begracijde, ende hy vraechde hem van waer hi was. Iudas seyde, heere dat en can ick v nyet gheseggen, mer ic ben opghehouden in eens conincs hof, ende nv ben ic hier ghecomen om eenen goeden heere te dienen. Doe seyde Pilatus tot hem wilt ghy mi dienen ick sal v goeden loon gheuen.

[fol. G1v]

Doe seyde Iudas. Eerweerdighe heere ic ben tot uwen ghebode, dus belieuet v ic sal v trouwelijcken dienen. ende van doen voort behielt Pilatus Iudam in sijn huys ende in sinen dienst.