Der IX quaesten

Hoe Iudas dootsloech sinen vader Ruben

Als Iudas nv was inden dienst van Pilatus so diende hi so wel, ende was so neernstich in alle dinghen van sinen here, so dat pilatus hem lieuer hadde dan eenich van sinen dieners, so dat meest al pilatus huys bi Iudam gheregeert was, so dat meestal die ander knechten waren sijn vianden. So geuielt op een tijt dat Pilatus ghinc spaceren om een luchtken te rapen, so quam hi ghewandert voorby eenen boomgaert die Ruben Iudas vader toebehoorden. waerin dat stont eenen schonen appelboom vol van

[fol. G2r]

appelen, vanden welcken Pylatus begheerde te eeten, ende hi riep Iudam tot hem ende seyde loopt lichtelijc inden boomgaert ende haelt mi appelen van den groten boom, oft tsoude mi qualijcken becomen creech icse niet Terstont liep Iudas inden hof ende hi beghan tacken vanden boom te houwen voor sinen meester pilatum Ende Ruben Iudas vader zijnde in sijn huys hoorde dat houwen an den appelboom, so terstont quam hi wt ende hi sach Iudam staen houwen an den appelboom ende si en kenden malcanderen niet. Ende Ruben wert seer gram ende seyde. Ghy sijt wel een quaet boeye dat betoondi wel an v wercke, Condi niet te vreden sijn metten appelen, ghy en moet mijnen appelboom verderuen. Dus hadden si te samen veel quade woorden, so dat si int eynde worden vechtende so langhe dat Iudas gecreech die ouerhant, ende hi sloech doot sinen eyghen vader Ruben.