Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Historie van Reynaert die vos (1892)

Informatie terzijde

  • Verantwoording
  • Inhoudsopgave

Downloads

PDF van tekst (0.83 MB)

XML (0.28 MB)

tekstbestand






Editeurs

H. Logeman

J.W. Muller



Genre

proza

Subgenre

dierenverhaal/-epos


In samenwerking met:

(opent in nieuw venster)

© zie Auteursrecht en gebruiksvoorwaarden.

Historie van Reynaert die vos

(1892)–Anoniem Reinaerts historie (Reinaert II)–rechtenstatus Auteursrecht onbekend

Vorige Volgende

[Cap. XVI.] Hoe reynert openbaerlick sijn biechte dede voer den coninck. ende voer een yeghelick diet horen woude

ALle die hier stonden dien iammerdet dat reynaert die woerden sprack ende seide Het waer een cleyne bede Ende hi badt den Coninc dat hijt hem gonnen woude Die coninc gaf hem oerlof Reynaert die was blide ende hoepte dat mocht noch wel beter vallen Ende sprack aldus Nu help Spiritus domini. want ic en sie hier nyemant ic en ben daer misdadich teghen Nochtans so was ic tot datmen mi speende een dat beste kint dat men ye ghevinden mocht Ick ghinck doe mitten lammeren spelen omdat ic dat ghebleet gaerne hoerde alsoe langhe dat icker ten lesten een verbeet Daer leerde ic dat bloet eerst mede lapen Het smaecte wel. dat dochte mi goet wesen ende ontgaen ten lesten dat vleysch daer wert ic lecker mede. soe dat ick ten laetsten liep ten gheyten int wout. daer hoerde ic die lammer

[Folio 28r]
[fol. 28r]

bleten ende ic verbeter daer twee. ende ic wort alle tijt coenre Ic verbeet voghelen hoenren ende gansen waer dat icse vant Aldus so worden mijn tanden bloedich. des so wort ic soe fel ende soe wreet. wat dat ic vant dat mi bequaem was ende dat ic vermocht dat verbeet ic al Daer na quam ic an ysegrym nv te winter. daer hi onder enen boem scuulde. ende rekende mi dat hi mijn oem was Doe ic hem aldus maechscap hoerde rekenen so worden wi ghesellen dat mi wel rouwen mach. wi gheloefden malcanderen trouwe ende /2131-2194/ goet gheselscap te doen. ende begonden te samen te wanderen hi stal dat groet. ende ic dat cleyn Ende al wast gemeen hi en maectet also niet hi en hielt dat beste deel Ende ic en creech dat mijn niet half wanneer dat ysegrym. een calf een ram of enen weder hadde soe grimde hi. Ende wort op mi toernich ende dreef mi van hem ende hi hielt dat mijn totten sinen aldus berf is hi

 

NOch dit was vanden minsten. mer alst ons also ghelucte dat wi enen osse of een koe vinghen. so quam daer sijn wijf mit seuen kinderen toe. soe en mocht mi nauwe een vanden minsten ribben werden Ende daer toe hadden si dat vleysch daer of ghegheten Hier moest ic mi op bedraghen Niet daer bi dat ick des yet behoefde. want ic hebbe so groten scat

[Folio 28v]
[fol. 28v]

aen siluer ende an goude dat seuen waghen en soudens niet wech moghen voeren Doe die coninc den groten scat hoerde nomen so bernde hi in der ghiericheyt Ende sprack reynaert waer is v scat ghecomen dat segghet mi Heer ic wil v segghen Die scat die was ghestolen. ende had hi niet ghestolen gheworden daer waer enen moert aen uwes selfs edel lijf gheschiet dat god verhoet heeft Ende die meeste scade vander werelt ware Doe die coninghinne dat hoerde. doe wort si seer veruaert ende riep lude. wapen o wi ach arme. lieue reynaert wat segdi Ick vermaen v op die langhe vaert die v siele varen sel. dat ghi ons hier die waerheyt openbaerlijcken of segghet. wat v kenlic is van desen groten moerde die an minen here gheschiet soude hebben. ende alsoe dat wijdt hier alle moghen horen Nv hoert hoert hoe reynert den coninc ende die coninghinne versotten sel. ende hi sel hore beyder hulde verweruen ende ghewinnen Ende beweruen den ghenen te hinderen die nv nae sinen dode aldus staen Dat is nv hem thuys ghecomen Hi wil nv eerst sijn sake ontbinden ende sien wat hi daer in vindet. dat hem nv te baten comen mach Nv wil hi vtermaten /2194-2247/ seer lyeghen Ende dat sel hi alsoe schoen bi brenghen. datmen al waers meenen ende wanen sel

 

[Folio 29r]
[fol. 29r]

IN enen droefliken schine sprac reynert totter coninghinnen. ic ben leyder soe dat ick niet en weet dan nv te steruen Al en had ghi mi dus hoghe niet becoert ic en wils op mijn siele niet laten staen. want ic most daer omme in die ewighe pine der hellen varen. in dien dat ic die coninck hier een ghescille maken wille. ick wilt hem mit staden segghen hoe iammerlic dat hi van sijns selfs luden verraden was te moerden Nochtan die des meest bedreuen dat sijn sommich van minen naesten liefste maghen die ic seer node bedraghe. en dede mi die sorghe van der hellen. daer si in quellen die moert of verraet weten ende dat niet wt en brenghen Die coninc wert swaer van herten ende sprac Reynert segghestu mi oec waerheide O wi sprack reynert siet di niet hoet mit mi staet. waendi dat ic mijn siel verdoemen wil wat soudet mi baten of ic anders dan die waerheyt segghen woude. mijn doot is mi doch so nae. mi en mach lacen bede noch goet helpen Doe beuede reynert daer hi stont van vresen in enen beueynsden schine Die coninghinne die iammerde dat ende badt den coninc op ghenade om meerre scade te scutten. dat hi dat volc stille dede swighen. ende dat si reynert audiencie deden ende sine woerden hoerden: Doe dede die coninc ouer luyt ghebieden dat een

[Folio 29v]
[fol. 29v]

yeghelic al stille sweghe ende het reynert omberispet wtspreken Reynert die vol loser trecken was hem ducht dattet op sine hant beteren wilde Nv seit hi Swighet nv over al. sint dattet minen here den coninc lief is so sal ic v sonder brief openbaerlic lesen die verradenisse Ende daer en wil ic nyemant in versconen dien ic daer sculdich in weet


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken