Veelderhande geneuchlijcke dichten, tafelspelen ende refereynen

Der Vrouwen Pater Noster.

Als dese Vrouwen gaen ter Kercken,
Om te hooren Godes wercken,

[p. 59]

 

aant.

 

Dan beghinnen sy sonder letten

 

Haer kapken uyter maten net te setten

 

Als zy dan comen inder Kercken,

 

Soo besienen zy Papen en Klercken,

 

Dan beginnen zy te lesen,

 

Nu hoort doch wat sal het wesen,

 

Pater Noster qui es in Celis.

 

Ondanc moet hebben Beatris

 

Dat sy heeft soo goeden cleederen an,

 

Waer mijn man als menigh ander man,

 

Hy soudese my ooc wel doen, maken,

 

Maer ick en kander niet aen gheraken,

 

Hierom blijf ick alsoo dom,

 

Sanctificetur nomen tuum.

 

Mijn man moet wel sijn een katijf,

 

Dat hy dus hout sijn goede wijf

 

Want also wel sout voeghen my,

 

Als eenighe vrouwe die hier zy,

 

Maer wat kan icker doen om,

 

Adveniat Regnum tuum,

 

Dat hy my dus qualijcken hout,

 

God geve hem droefheyt menighfout,

 

Om dat hy niet en houde wat bat,

 

Want hy seer geerne vergadert schat,

[p. 60]

 

aant.

 

Het welc die oorsaec is dat ick dus armelijck, ga.

 

Fiat voluntas tua.

 

Voorwaer ic salt wel anders maken,

 

Ick sal wel op den solder geraecken,

 

Daer Gerst en Haver op leyt

 

Al borst mijn man van quaetheyt,

 

Ick sals wel soo veel vercoopen,

 

Dat ick my wel met silver sal knoopen,

 

Al waer de katijf noch zoo erra.

 

Sicut in Celo & in Terra.

 

Ick hebber noch beter in mijnen kist,

 

Dat ick hem onthielt met grooten list,

 

Ick sal daer schicken geldt af te maken,

 

Soo haest als icker kan toe gheraecken,

 

Dat ick den luyden mocht behaghen,

 

Wanneer sy my dan wel besaghen,

 

Achter, voor, ende alom.

 

Panum nostrum quotidianum

 

Dat ick hadde goede klederen aen

 

Soo mocht ick frisschelijc heenen gaen

 

Twee propere uyt-ghesneden schoen

 

Eenen breden timp aen mijn Caproen,

 

Ende twee smalle Platijnen,

 

Soo soud ick noch veel frayer schijnen,

 

Als ick dan noch hadde mee.

[p. 61]

 

aant.

 

Da nobis hodie.

 

Eenen frayen lustighen Kransse,

 

Daer soud ick gaen te dansse,

 

Als my dan de luyden saghen,

 

Soud ick alle ionghe ghesellen behaghen,

 

Elck soude gelijc ick willen doen,

 

Nu wil ic my daer toe gaen spoen,

 

Ist datter in huys noch Cooren is.

 

Et dimitte nobis.

 

Wanneer die Paep van Preken scheyt af,

 

Soo help my Godt int heylich graf,

 

Waer die Misse slechts ghedaen,

 

Soo soud ic aen der Marct gaen,

 

En dat ick wat sinlijcx voor my kochte,

 

Ende oock mijn soete lief wat brochte,

 

Want mijn man is te pra,

 

Debita nostra.

 

Hy en comt niet thuys in acht daghen

 

Dat mach mijn hart seer wel behaghen,

 

Want hieren tusschen sal ick wel

 

t'Goet vercopen met haesten snel,

 

Ende coopen daer om mijn ghevoegh

 

En houden nochtans geldts ghenoegh,

 

Daer mede sal ick gaen te Wijn

 

Aldaer de jonghe ghesellen zijn,

 

Eer mijn man sal comen thuys.

[p. 62]

 

aant.

 

Sicut & nos dimittimus,

 

Wat wil icker meer af segghen

 

Mijn man sal eeren, ende Egghen,

 

Ende selue gaen inde ploegh

 

Want daer toe is hy goet ghenoegh,

 

Ende daer toe streckt al zijn begehren

 

Ick sal dan doen sonder cesseren,

 

Ghelijck als vooren, dat is ghewis.

 

Debitoribus nostris,

 

Wat soude ick doen met erue oft ghoet

 

Want ick immer steruen moet,

 

Ick wilder mijn gherief af hebben

 

Sonder eenigh teghensegghen,

 

En zijn dan blyder dan ick noch oyt was,

 

Et ne nos inducas,

 

Ghevader en ist niet waer

 

Lieue vader jae t'is waer,

 

Wat soudt ghy doen met erue oft schat

 

Daer v niet af en waer te bat,

 

Ghy zijt noch jongh ghy meught verwerven

 

Veele goets eer ghy sult steruen,

 

Och wou de Paep toch haesten hem.

 

In temtationem,

 

Aldus maken sy groot gheschal

 

Dan roept de Coster over al:

 

Ghy vrouwen ghy maeckt soo groot gheluyt

 

Beydt toch tot dat die Misse is uyt

[p. 63]

 

aant.

 

Ghevader de Paep segent hem.

 

Sed Libra nos a malo Amen

 

Nu segget hy ons alleen,

 

Laet ons nu op onse knien vallen,

 

Wy zijn nu alle wel besegent,

 

Ghevader en weet ghy niet oft regent

 

Ick en hebbe geen ommekleedt,

 

Aldus staen zy op gereedt,

 

Met soo danighen innicheyt

 

Hebben zy haer Gebedt gheseyt,

 

Als zy dan comen uyt den Kerck // gaen

 

Soo vangen zy alsulcken werck // aen

 

Dat die man mach vresen alst vrou comt t'huys,

 

Want vrouwen Pater noster lesen is eens mans kruys.

 

 

 

Finis.

 

De vrouwen lesen somtijts een Pater noster

 

Welc zy geleert hebben van Paep noch Coster

 

Wanneer heur mans droncken thuys comen

 

Soo lesen zy Pater noster sonder schromen,

 

Hierom ghy mans biecht v tegen v vrouwen

 

Leert ooc u seven getijden van haer onthouwen.