|
| |
[Den reghel van Aernouts arme broederen.]
Den Reghel, ende scharpe sware Oorden van Aernouts arme
Broederen: Item vanden jonghen Aernout, ende hoe hy eerst inde werelt
comt.
Hier meught ghy lesen der broederen habijt
Diese draeght sal s'Winters zijn bevrijt,
Voor groote hitte, maer niet voor couwe,
Want sy dragen de ellen-boge deur de mouwe,
De heylighe Vader sinte Magher-sot,
Heeft doen verkondighen een Ghebodt,
Oft daer yemant wilde ontfaen,
Zijn Ordonnancie, ende wesen onderdaen,
Hy was van Gecx-huysen diese eerst insette,
Den Reghel vander knoopen ende nette,
Ic wil v gaen vertellen de heylighe Oorden,
In onser sprake met duytsche woorden.
De eerste broeder die hy ontfing
Ghewillichlijc inder Oorden ging,
twas broeder Aernout met grooten smart
Sulcken Wet te houden viel hem hardt,
| |
| |
Want hy leedt menighen droeven dach
Honger ende dorst, twas quaet gelach
Al dit hy om der Oorden wille leedt
Ick soud schier segghen met eenen Eedt
Dat hy in al zijn tijt van leven
Noyt vrolijcken dagh en heeft beseven
Want al zijn welvaren was deure,
Maer sinte Mager gaf hem de avontuere,
Dat hy een Heere ende Abt is gheworden,
Inder selven Rabauwen Oorden,
Hy gaf hem daer sulcken kracht,
Alsoo dat hy met zijn eyghen macht
Andere broeders oock mocht beraden,
Want Heer Magher ontfangtse in genaden,
Alsse willen draghen zijns Oordens habijt,
Hy dede totter Oorden groote vlijt,
Groote Privilegien hy hem gaf,
Alle dese Oorden is daer gecomen af,
Ende daer den Reghel altemael op steet,
Want den Abt was altijt bereedt,
Tot dat Privilegium t'welck is aldus,
Lieue ghesellen wilt ghy v nu bekeere,
Ende de heylighe Oorden eeren,
Om der Rabauwen Reghel te ontfaen,
| |
| |
Soo moet ghy wijselijck daer nae staen,
En ghelooven dat in goeder trouwen,
Ghy met vreuchden somtijts in rouwen,
Ons heylighen Oorden wilt houden dan,
Al sydy iong, toont v als een man.
Oock sult ghy weten sonder vraghen,
Der Oordens habijt sult ghy moeten draghen,
Nae sinte Maghers Reghel ende Wet,
t' Welck is een geknoopt hemde, ende een net,
Wy sullen v dit minlijck schincken,
Ghy moet v klederen eerst verdrincken,
t, Zy broec, wanbays, oft mantel net,
Ghy moet het al doen onbelet,
V hoedt, u coussen en schoenen jent
Moet ghy alhier laten present,
Voor den haghel dunne, licht voor de windt,
Moet ghy v bekleeden wel lieue kindt
Soo meught ghy metter Oorden paren,
In gheen saken en wilt sparen.
Ooc moet ghy lopen als een Narre,
Want onse Klooster staet seer verre,
Ende onse Dormijter seer hooch befaemt
| |
| |
Is verbrant hy was nerghens nae ghenaemt,
Oock moet ghy al wat goet is haten
Al dat deught is wilt achter weghe laten,
Ghy moet aenveerden alle dwaesheyt
Ende spotten met alle wijsheyt,
Ghy sult oock alle schalckheyt stellen voort
Ende spreecken selden deuchdelijck woort,
Vloeckt sweert, ende weest lecker mede
Ondeughdelijck, traech tot allen stede,
Wanneer ghy comt in Heeren Hoven
Wilt dan eeren, ende oock louen,
Deghene die inde Keucken zijn
Soo meughdy krijghen vleesch, broot, en wijn,
Eet, ende drinckt, bemint de kruyck, dan
Voor uwen Godt verkiest uwen buyck, dan,
Mette schotel inde handt, zijt niet confuys
Laet de Keucken zijn v Gods-huys,
Metten Prime zinght dan alleen
Eens anders Jae, laet zijn v Neen,
Tertie, None ende Deprofundis
Laet varen: maer leest dat totten mondt is,
Laet oock varen den Magnificat
Ende vult daer voor uwen buyck wel sat,
Pater noster, ende Credo t' uwer zeghen
Sult ghy oock laten achter weghen,
| |
| |
Want sy en behooren inder Oorden niet
Die sinte Magher te houden ghebiet,
Laet sulcx al leesen Nonnen en Bagijnen
Die onheyligher zijn dan zy schijnen,
Maer sorght alleen tot uwen speele
Hoe ghy meught vullen v keele,
Nemmermeer en suldy werck bestaen
Maer ghy moet v gheneren met ledich gaen.
|
|
Auteursrechtelijk beschermd