|
| |
Hoe Aernouts broederen sullen spreken metter Vrouwe als de Man
van huys is.
Als v swaerlijck den hongher bestaet,
Soo dat v den buyck aen de ribben slaet,
Ende ghy dan comt in dorp oft stadt
Bereghent, beslijckt, cout, ende nat,
Soo seer dat ghy hebt den klippertant
Ende soo ghy dan hebt geldt noch pandt,
Noch oock vleesch noch broodt
Maer hebt hongher en dorst seer groot,
Soo hoort wat ghy dan sult bestaen
Stoutelijck sult ghy v dinghen aenghaen
Ende gaet alsdan int eerste huys
Segt: hier vaer wt alle quaet ghespuys,
| |
| |
Schuddet dan lichtelijck v lodder-hout
Ende segghet: Vrouwe duysent fout,
Moet alle v ghoet en rijckdom vermeert zijn
Ghy zijt soo edel, soo jent soo fijn,
Ende oock gheheel van goeder aert
God heeft v oock seer wel bewaert,
V lijf, v ziel, v ghoet, ende v eere mede
Maer vint ghy den huys-heer daer niet ter steede,
In, oft by zijn huys, doet sonder gheschal, dan
Soo ick v rade men beginnen sal, dan,
Wilt ghy anders ghelt en goedt bejaghen
Soo begint van meesteryen te ghewaghen,
Seght dat ghy een meester zijt in consten wijs
Teghen veel zieckten weet ghy goet advijs,
Hebben sy hooft-zweer oft tant-zweer rede
Seght ick kanse genesen, de Gicht oock mede,
Den hoest oft oock een coude maghe
Kunt ghy verdrijven van daghe te daghe,
Oock sult ghijse wel betasten
Ist datse vet zijn, zoo heetse vasten.
Seght dat ghy oock kunt snijden den steen
Ende daer toe heelen arm, en been,
Ende hoe de zieckten gheleghen zijn
Dat kunt ghy al helpen seer wel en fijn.
Hebben zy dan pijn oft hooft-zweer
| |
| |
Rommelingh in den buyck oft ander seer,
Van sulcke zieckten sult ghijse remedieeren
Ende sult dan eenighe Medecijnen vercieren,
Doetse heur proeven deur een ghoet woort
Ghy sult dat oock dickwils brenghen voort,
Ende dan na alle v viese vasen
Sult ghy haer driemael inden eers blasen,
Sy sullen v dan gheuen al wat ghy wilt
Krijght ghy visch oft vleesch, weest dan ghestilt,
Gheuense v Broodt, oft eenich geldt
Neemt dat, ende maeckt v wech opt velt,
Bedanckt haer seere met zinnen vro
In ander huysen doet oock alsoo,
Versmaet gheen giften groot noch kleen
Maer vindt ghy erghens de Maeght alleen,
Oft de dochter vanden huyse voorwaer
Spreeckt dan van een ander conste klaer,
Ende seght dat ghy een waer-seggher zijt
Van Parijs verdreuen in corter tijt,
Daer hebdy waer segghen gheleert
Ende zijt daer door seer wel vermeert,
Wijdt, ende breedt door al dat landt
Int aensicht te sien oft in de hant,
Het sy in de spieghel, oft Phisionomie
| |
| |
Ick verstaet eeven wel het en mach niet voorbye.
Ick weet noch consten sonder ghetal
Om te comen in het aldersoetste dal
Daer Maeghden, en Jongmans zijn gheseten,
In liefde verdoolt, soo derf ick my wel vermeten,
Haer te helpen elck nae liefs verlanghen
Ende dat elck sijn lief lieflijck sal ontfanghen
Soo mach elck zijns liefs wille volbrenghen,
Al wat lief begeert sonder verstrenghen.
Al hadde ooc een maeght een boelken vercooren
Ende datse haer maeghdom ooc hadde verlooren,
Soo datse ghespronghen had over het zeel,
Ic salt altesamen wel maken heel,
Den eenen sult ghy van kruyden leeren suypen
Den anderen doen baden in kuypen
Den derden suldy doen laten op den enckel
Aen den arm oft aen den schenkel
Aen den voeten, ende aender handt
Soo suldy alomme worden bekant
Ende voor een meester werden gehouden
Beyde van jonghen ende van ouden.
|
|
Auteursrechtelijk beschermd