Gründtlicher Bericht, ob Zauberey die argste vnd grewlichste sünd auff Erden sey

[p. 13]

Das V I. Capitel.
Die Zauberer vnd Zauberinnen seynd erger als sonst einige Gotteslästerer.

1. Gotteslesterung ist ein vberausz grosse vnd grobe Sünd, die Gott ohn alle gnad zustraffen befolhen. Nun seyn wol heil vnd gottlose menschen, die zwar Gott ausz trunckenheit oder böszheit, ⁺ zorn, oder vngedult lästern aber darnach rew vnd leid tragen:

Die zauberer vnd zauberinnen die lästern ⁺ Gott, vnd seine Heiligen, vnnd alles was Gott angeht, auffsetzlich, ausz hasz vnd on vnderlasz, vnd dargegen ehren vnd anbetten sie den teuffel on schew vnd rew.

2. Die Gott sonst lästern ausz zorn, verleugnen doch nicht alsbald Gott gäntzlich vnnd zumahl:

Die zauberer vnd zauberinnen, die lästeren vnd schmehen Gott, vnd was Gott angeht, also, das sie in auch gäntzlich verleugnen.

3. Die Gotteslästerer betrüben vnd beschedigen zwar sich, vnd ire stell selbsten, aber gemeinlich seind sie derhalb nicht gemeint oder geflissen ihren nechsten ahn leib oder, gut zu beschedigen vil weniger zuuerderben.

Die zauberer vnd zauberinnen aber lesteren vnd schmehen nicht allein Gott, vnd seine Heiligen, vnd beuorab seine hochheiligste Mutter

+ Leui. 24.

+ Quomodo Deum & sanctos & potissimam Deipaeram blasphement, Vide Sprengerum porta 2. Q. 1. ca. 2. in malleo.

[p. 14]

zu irer eigener seelen schaden vnd verderben, sondern sie seyn auch stettig darauff ausz hasz Gottes vnd ires nechsten, dem teuffel aber zu ehren vnd zu dienstlichem gefallen, iren nechsten durch zauberische teuffelische mittel an leib vnd gut, ja auch wol an der seelen zubeschedigen, vnd in eusserst verderben sammt vnd mit inen zustürtzen.