Gründtlicher Bericht, ob Zauberey die argste vnd grewlichste sünd auff Erden sey

Das X X I I. Capitel.
Dero Zauberer vnd Zauberinnen Sünd ist respectiuè ärger als des Teuffels Sünd, darumb er ausz dem himel gestossen.

1. Dann der teuffel hat gesündiget, als nie keine sünden straff vergangen:

Die zauberer sündigen, vngeacht, das so vil mal solche sünd erschröcklich gestrafft worden.

2. Der teuffel ist nicht durch Christum erlöszt:

Die zauberer seynd durch Christi theurbar blut erlöszt, vnnd verlassen vnd verleugnen ihn gleichwol.

3. Der teuffel ist niemahln zu gnaden auffgenommen, wirt auch nimmer gnad erlangen:

[p. 44]

Die zauberer vnd zauberinnen seynd in der tauff, vnd nach der tauff offtmals zu genaden kommen, vnd verleugnen Gott gleichwol. Haben hoffnung das sie noch können gnad erlangen, da sie sich bekeren: Bleiben gleichwol den mehrertheil verstockt vnd vnbuszfertig. Vide malleum maleficarum parte 1. q. 17. pag 196.