Diarium van Egbert Alting 1553-1594

[p. 10]

Maendach 19^en Martii 1554.

Ioachim Ubbena ende doctor Abbringhe¹⁾ hebben hoer rapport van Deventer weder inghebracht angaende de tho hoepesate, to weten, dat men de voer dytmael gantzlyck dachte aff to slaen ende sich to holden na den olden recessen, soe voele betreffet de onderholdinghe der conthoeren ende derselver gherechtichheyt ende sulx den van Colln tho to schrijven ende dat de dachvaert to Lubeck wall worde nablijven²⁾.

Oeck ghehandelt van itlycke beswaringhe, van den borgheren voerghegeven, belangende de gherechticheyt des oldermans ende der hoevelingen van den schutten, daerup ter endtlyken affscheydt ghegeven, dat de olderman mit den Ghildtrechte behoerde de kenninghe ende wes se myt hoeren eedt konden beharden, muchten se na den boecke, daerup se gheswoeren, berichten ende voert ghedeputeert, um des oldermans eedt to concipieren sampt desselves commissie.

Ten darden, van de affkundinghe des placcaetz van ghene victuaille uuth the voeren³⁾ ende na mennichvoldighe disputatie de consequentia evitanda ende we de Overijsselschen tselve niet dachten aff to kundigen etc., is besloten, angheseen men daeraff mitt ytlyken in den lande besproeken, de daerin gheconsenteert hadden, dat men ydtselve mit protestatie van ghene consequentie wolde voer dytmael publiceren laten, daermit de stadt allene niet in archwaen ende des hoves ongunst durch quaet anbrenghent muchte komen, voerbeholden dennoch, dat, soe men vernoeme, dat de lieutenant mitten hoefftluden wolden mandaten to lande derselver sake halven, um daer de publicatie to laten gescheen, uuthsenden, solde men daeraff den hoefftluden begroeten ende vermaenen, dat sulx neet en behoerde, nadem de lande doch gheholden weren allen hoeren waeren binnen Groningen ter stapell ende nerghens anders te kope tbrenghen, went se anders na de expiratie des verbotz muchten argumenteren per locum a contrario sensu etc.

1) Dr. Hermaruius Abbringhe sinds 1548 syndicus van de stad.

2) Inv. Hansischer Archive, Kölner Inv. blz. 66. To hopesate = verbond.

3) Het plakkaat, houdende verbod van uitvoer van victualiën, werd herhaaldelijk verlengd, b.v. 25 november 1553 (Charterboek van Vriesland III blz. 322). Zie ook dossier G.A. voorl. nr. 1406 en hierna blz. 33.