Diarium van Egbert Alting 1553-1594

[p. 159]

Maendach 19 Septembris 1569.

Hebben B. ende R., oldt ende nije, sampt T., S.M. ende B.v.d.g. verdragen ende gesloten, dat ghene harbargeren noch tapperen enige Groninger bieren sullen innemen ofte inslaen, noch oeck innemen ofte inslaen laten, dan durch den ghesworen tunnendrageren in oer cluft ende dat oeck neet voer ende aleer se deselve tunnendrageren daeraff een cijssteken ofte szedel van den axcijssmester ghetoent ende den axcijss betaelt hebben, welckeer szedell alssdan de tunnendrageren an sich beholden ende in een snoer gheregen den axcijssmester alle Sondagen tho twe uhren nae den middach tsamen weder overbrengen ende behanden sullen.

Ende sullen de harbargeren ende tapperen van iider tunne beers, soe boven een dhaler staet, tho axcijss gheven, van iider arens gulden een stuver sunder dhalers bier unde wes daer under staet, sal men van de tunne gheven 4 st., woe van older gewoentlyk.

Dussen Groeninger bieraxcijss heft de erb. Evert Eeltz een jaer lanck als axcijssmester tho bedenen angenomen, de daervoer tho salarys sall geneten 50 embder gulden.

Is oeck verdragen ende geslooten, dat de mulders gene granen, koren ofte molt, ter moelen komende, sullen malen offte malen laten, sunder eerst een cijssteken offte szedell daraff ontfangen thebben, welckeer szedell se oeck tijdtlix in een snoer rijen ende darnha alsso alle Sondagen to twe uhren nae den middach weder in der cijsskamer thosamen sullen overbrengen.

Dat oeck de mulderen (soe enige sacken offte oeck gehele browlick¹⁾ ter moelen ghekomen, daer em an twijvelde, dat meer alsse de mathe, het darup ghegeven cijssteken vermeldet, in wesen muchte) geholden sullen sijn, deselve sack offte browlick tho methen unde des, waer tho voele in bevonden worde, bij oeren eede in de axcijsskamer antogheven. Ende dat een iider mulder up sijn moele eener sall holden, die lessen ende schrijven kan.

Des sall de gemene ghilde hiirvoer jaerlix van der stadt ghenieten 40 embder gulden, waervoer se des oeck alssoe angenomen ende volgenden dages eenen behoerlyken eedt up ghedaen.

1) Brouwelic = brouwsel.