Diarium van Egbert Alting 1553-1594

Vrijdach 22 Maii 1573.

Alsoe enige deputeerden, naemptlick Focko Mennens, Doe Luppens, Ulphert Ayssens ende Doe Waldricks van wegen Borxsweer, Aylt Pheebkens wegen Oldermunte, Aysso Pheebkens, Phebe Harckens, Walrick Reynts ende Walrick Luppens van wegen Grotermunte, Bonno Hayens, Walrick Doens en Tyddo Hayens wegen der van Woldendorp seker accordt ende vordrach ingegaen mit Regnerum Bousema, des saligen pastoers ende kerckheren Rombertus Bousema nagelaten soene, om an sijn Ex^e. to verwarven, van de last der zeedijcken enigermaten verlichtet tho worden ende doer oculare demonstratie van dien, soe tusschen den vorsz. 4 karspelen ende der stadt Groeningen gelegen ende sunst mit ghenen dijcken beswaert ende nochtans doer den onderholt offt verdarff derselver dijcken mede erholden offt noetdrufftich, oeck undergaen ende verdorven musten worden²⁾. Waervoer dan denselven Bousema thogesacht 500 embder gl. Ende want dit alsus all Maendage na Martini laestleden anhe consent offt voerweten van een erb. Raedth practizeert ende tho wege gebracht, sijn se samptlyck daer up huydigen dages vorscreven, de volgents hoer excuse ende onschuldt oerer over mate beswarung voergebracht, mede woe se neet gemeent een erb. Raedt vorbij tho gaen; hadden oeck in der saecke noch neets attenteert oder angevangen, dachtens oeck neet tdoende, dan begeerden een erb. Raedt hoer voerstanders wolden sijn, daermit se vortroestinge ende der dijcken verlichtinge bekomen muchten, erbiedich ende annhemende, den uuthgesneden verdrachcerter in sRaedts handen tbrengen, woe dan Regnerus rede voerhen den sijnen all overgelevert gehadt; solden ongeveerlick 25 offt 26 karspelen onder Lieutenant ende Hoefftmannen ende neet onder B. ende R. geseten sijn, de den vorsz. zeedijck mede solden ter billicheit behoeren tonderholden, als de mitten selven beschutt ende bewaert worden. Item dat de ander certer bij Bonne Hayens weere etc. Hiirup hefft een erb. Raedt se guedtlick gehoert ende mit goede tosage vortroestet, het beste in der saecke, des versocht, te willen doen ende anwenden, soe ende daer des behoeren soll ende sint alsoe weder laten gaen ende affgedanckt mit vermaninge dennich, midlertijdt, woe voerhen, de dijcken in aller vlijth ende neersticheit tonderholden, daer voernemelick hoer egen walffaert am meesten angelegen.

2) De zin loopt niet helemaal. De bedoeling was de tussen de genoemde vier en de stad Groningen gelegen dorpen eveneens te belasten met het onderhoud der dijken.