Diarium van Egbert Alting 1553-1594

Maendach 15 Februarii 1574.

Der heer coronell bij B. ende R., olt ende nije, sampt T., S.M. ende B.v.d.g. upten raedthuse erschijnende, hefft vortoent 2 requesten, deene in Latijn ende dander in Duytsch, van der stadt wegen to hove overgeven, daerinne begeert worde, dat men den koer na older gewoenten soll moegen doen; derwijlen de Raedt ende geswoernen vast geringe int getall ende iider sunst sijn egen geschefften tdoende, de nu vijff, ses jaeren continuelyck geseten etc., vormeldende dat sijn Str. deselve em mit commissie togesonden, om in den koer tho versehen ende vernijerung des wettes voer de handt tho nhemende. Derwijlen oeverst de tijden ende menschen idts anders dan voermaels gestalt, wol noedich sijn bequeme middelen to gebruycken, daermit de stadt voertan mit eenen goeden Catholyckschen Raedt muchte versehen ende versekert sijn, des dan oersaecke geven soll van der besettinge te moegen entledight worden, begeert der wegen inrhedich mit ons tsijnde, om mitten ander een goedt middell te treffen, daer sijn Exc^e muchte contentement an gegeven worden, solden nochtans allene hiirbinnen woenachtich erwhelet werden, het weere bewust, wes uuth de onformlyckheit des olden koers voer onrhouw deser stadt bejegnet, des kumpstichlick behoerde remedieert tsijnde etc., mit wijderen durch des heren lieutenants voergevent.

Hiirup weder inbracht postridie, quod sequitur.

Edele gestrenge ende genediger heer, upt angevent van euwer genade, alse dat na deser tijden gestalt ende gelegentheit enige anderung in des Rhades koer soll behoeren tho gescheende etc., gheven daerup de geswoerne dusser stadt in onderdanicheit to verstaende, woe se dusser tijdt seer swack ende geringe int getall, dat oeck hoer gesanten noch uutheymsch sijn, tho dem dat se elck hoeren eedt up den stadtboecke gedaen, weshalven se sich eerst hoers persoens, daernah oeck hoerer kinder ende nahkomelingen halven gants beswaert vinden, enige voranderinge in sodanen olden gewoentlycken koer in tho laten, sunder erbieden sich de vrunde van der Swoerne Meente, dat se sich int kiesen des Rhades diermaten sullen ende willen dragen ende holden, dat euwer genade ongetwijfelt an de gekoerne personen een guedt gevallen ende benoegen werden nhemen. Bidden ende begheren seer oetmoedelyck, se ende dese stadt bij hoer olde privilegien, vrijende gerechticheit onverkortet blijven ende gehandthavet moegen worden, woe sulckes durch den tractaten genedichlycken ontheten ende beloefft is.