Diarium van Egbert Alting 1553-1594

Donderdach 25 Februarii 1574.

Sint na overgelachter saecken etyke des Raedts mitten taelmannen ende

[p. 265]

bouwmesteren an sijn genade gaen, om to weten, woe idt dan mit der Swoerne Meente gaen soll. Item off daerin oeck de verstarckinge edder vervullinge van se soll gescheen moegen. Daerup gesacht, men eens so voele solden noemen (idem oeck also bij den Raedt) als der personen feilden, de men sijn Ex^e. solden overschicken, omme de helffte daeruuth te nemende etc. Ditselve noch weder durch de heeren stadtholder ende lieutenant den samptlicke heeren ende vrunden mit wijder verclaringe van onraedt van de olde gewoente etc. angegeven etc.

Is na affgaent ende overleggenth daerbuten den heeren weder inbracht, woe men sich mit meer vrunde desen angaende solde hebben na older gewoente tho versprekende ende dat men daerna het antwort bedacht scryfftlick inthobrengen, des dan also mede voer guedth angesehen.

A prandio.

De voerneemblycke borger ende olderluden van de ghylden up den huyse verdaget ende binnen gheeisschet, is den selven der heren voerghevent ende angewante beswarung voergeholden mit sampt de antwoerth, laestmael overgegeven endeneet accepteert, dan den geswoernen weder behandet, waerup deselve sich beraetslaget ende sich geresolveert, bij hoer olde privilegien voert den stadtboecke ende andere gerechticheiden, de em durch lofflicke tractaten bekrefftiget, te verblijvende, doch sich lestlick entsloten in sodanen bescheedt noch weder scryfftlick voer antworth inthobrengen, als hiirna volget:

Edellgestrenge ende genadige heer. Nae genomen raedtlyck bespreek mit de voernemblycke borgeren sampt oldermannen van den ghylden deser stadt, solde noch wall het onderdanich biddent ende begherent sijn, dattet voerige hiirbij gefueghte antworth mitter angehenckter erheefflycke erbiedinge alnoch soll moegen in genaden verstaen ende angenomen worden, offte (derwijlen de gewoentlycke tijdt ydts verstreken) dat dan de van de Raedt onder sich selffs de vervullinge des Raedts van ghoede bequaeme mannen bes de bestemmete tijden sullen moegen doen, in fuegen ende manieren sulcks in plaets der affgestorvenen raedtspersonen tho gescheende gewoentlyck. Ende voerts oeck de borgermesteren sampt hoefftmannen ende andere officianten tho kiesen, woe des van oldts behoert. Midlerwijle de van der Swoorne Meente noch gecontinuert blijvende, offte oeck anders de verstarckinge ende behoerlycke vervullinge daerinne durch se tho gescheende.

Ende soveer enige puncten in den stadtboecke to veranderen sijn solden, begeren de geswoerne sampt anderen des behoerende daerinne geboerlycken tho versehende, gelijcken des van older vrijheyt gebruycklyck ende sunst na der tijden ende saecken gestalt ende gelegentheit egen ende behoeren sall.

Gants onderdanichlyck biddende de stadt Groeningen ende derselver borger ende ingesetenen mit tegenwoerdige hoere onderdanige erbiedinge in genaden moegen vulstaen ende sunst anders bij hoer olde privilegien, vrij- ende gerechticheyden, woe voergenant, blijven ende gehandthavet worden.

Alsus mittet eerste van den 16 huius overgegeven den 26 Februarii 1574.