Diarium van Egbert Alting 1553-1594

Saterdach 29 Decembris 1576.

Is den geswoernen vermeldet, wes ghyster mitten heren versproecken, oeck van de placcaten beraedtslaget, offt oeck daerin tegens der stadt vrijheit eets nahdelichs bevonden, als oeck bij den Gelderschen bescheen. Item wes bij den rentmester van confiscatie upgeboert, anderen behoerende, van renten offt anders tho restituerende; item wat schulde offt renten voer der publicatie van der munte verschenen, na der voeriger evaluatie alhiir tot sRaedts kennisse te betalende etc. Hiirinne een erb. Raedt mitte geswoerne bekummert wesende, wort doer den doerwaerder angesecht, daerbuten enige borgers vergadert te wesen, de begeerden mede in de raedtkamer binnen te wesen ende de sulve voerts geësschet, is Garbrant Heynens mit Duert Alberda mit ongeveerlick 20, 30 starck voer der stadtsgeswoernen erschenen ende voerts aldaer verclaert, gekomen tsijnde, dat men de pacificatie desen dach publiceren solden, daer sunst menniger schade vermidts vertoch an gelegen; oeck stunden de luyde voer der poerten, de anders neet konden offt dursten inkomen. Geantwoerdet, woe men de placcaten nu erst mit een bijgefueghden brieff¹⁾ van sijn Ge. entfangen ende de publicatie doch huyden offt ten langsten morgen tdoende entsloten, allene dat men ydts noch beraedtslaende weere als voere ende dat der stadt ende gemene borger ten besten. Daerup gesacht, se dan oer beclach an den heer stadtholder musten doen, enige nochtans des an de geswoernen verblijvende ende sint also affgetreden, sunder na sijn Ge. wijders te lopende.

Daermit dan der goede luyde wille ende anghevent vullenbracht, hefft een erb. oer beraedtslach terugstelt ende stracks an den elect gesonden, om de clocke geluedt te werdende, twelcke bij hem in bedencken bes morgen genomen. Sulcks den heer stadtholder vormeldet, wol er tegens morgen bij se verschaffen, de publicatie up morgen gescheen soll, des der elect toernich ende hefftich ingenomen etc.

1) Zie Reg. Feith 1576 nr. 69

[p. 359]

Als upten middach 2 borgermesteren ende der syndicus bij den heren to gaste gewest, had sijn Ge. onder anderen gesacht, er neet geweten de contreloer in quade gratie der borger gestanden, wolde sunst ghyster a prandio neet mit em upt casteel ende bolwareken gerheden hebben, als he tot sijnen ernstigen versuecke gedaen. Nota, dat voert daerna den selven contrerulloer sijn (to wetende borgerm. Jacob Hilbrants) huys doer den soldaten tot ener vangenschafft angeboeden, daer he sunder oer consent neet soll moegen uuthgaen.