Diarium van Egbert Alting 1553-1594

Vrijdach 28 Decembris 1576.

Sijn de voorsz. breve mit contentement der gantse geswoernen gelesen ende als een brieff allene an den lieutenant²⁾ om publicatie des placcaets gescreven, hefft men an sijn Ge. verclaren laten, tselve tegens older gewoente were, soe der lieutenant hiir niet te gebiedende ende is de hele Raedt desenthalven, mede om

2) Zie Reg. Feith 1576 nr. 68.

[p. 358]

verlichtinge der soldaten ende oepeninge der poerten, oeck te verstaende, wes sijn Gen. bevell sijn muchte na inholdt der voersz. breve, de em beyde voergelesen. Sacht, voer erst bevell thebben, onse deputeerden gelijck andere daer mit absolute vulmacht solden komen ende dat er mitten soldaten wol spreken, tbeste te willen doen, dan so lange se neet betaelt ende versekert off onder eedt gebracht, konde he se neet gebieden; ende tplaccaet angaende woll er uns bij missive toschicken ende up de demolitie des casteels, daer wij hart om anhielden, soll er sich erkundigen ende de gelegentheit daervan overscrijven. Item versproecken, dat tplaccaet van de settinge des geldes soll verstaen worden, dat wes voer verschenen, na der voerige valuatie soll betaelt worden, doch is sulckes den gerichte heimgestelt.

Ende soe wij onse grote beswaringe alhiir entdecket de besendinge angaende, hefft sulcks mede bekendt ende dat wij tselve met sijn G. hiir solden moegen doen, dan musten eedt doen gelijck anderen etc. Is oeck vermeldet van een breff, bij Don Jan dAustria an den soldaten gescreven, de gevangenen weder to entledigen. Antwoerde, derwijlen sijn commissie noch neet accepteert, soll sulcx silentio moegen verbijgaen worden; hefft ons oeck beloefft extract uuth sijn G. commissie te gevende.