Diarium van Egbert Alting 1553-1594

Vrijdach 21 Junii 1591.

De van den Raedt, olt ende nije, worden elck bij 2, bij 3 tot verscheyden noetdruftige warcken als besorgers, drijvers ende upseheners gestelt ende verordnet.

Der jonge gesellen vendel tot 200 upt grote rondeel tverstarcken bewillet. Penden postridie de neet comparanten, absentes filios pro excusato habent.

Stadtholder, ruter ende knechten upt Schutendiep ende buten der A poerte logeert, dieselve tijdtlicx tot 30 of 40, om hoer noetdrufb thaelen, ende neet meer in tlatende.

Ghyster ende huyden dapper scharmutzel up Helper esch geholden, doeden gelaten, gevangen binnenbracht, vendels ende anderen in Huynge huys upte

[p. 829]

Wijart versamblet, daer dan van tbolwarck gewaldich tot hem ingeschoeten ende neet weynich van gequetst ende verdorven, tot hoerer glorie voer Groeningen trotsmoedich mit onversicht gebleven ende neet an der stadt, dan buten verdarff bedreven.

Voerslach van 4 poerten mit eerde te vullen, Heer- ende binnenste poorte, alsoeck Ebbinge ende tbackers huys aff tbreken. Wallen doersteken, om twater int lant tlopen, tReytdiep ende Hoernse deep to tdammen.

De borstweer ommeheer mit zoeden upgeset ende verstarcket, mit der borger groet vlijth ende arbeyt.