Hoe ende wanneer biscop Ansfrijt oflivich worde.
Dat X capittel.
Hiernae is dese heylighe bisschop Ansfrijt van God ghevisiteert ( want hij Hem behaechlick was ( ende is blint geworden. Ende heeft dit verduldelic geleden, ende hem te meer totter Goeds dienst ghegheven ende te vermeerren. Ende heeft een cloester ghesticht van Sinte Benedictus oerde opten Heiligen Berch bi Amersfoert in der eeren van Onser Liever Vrouwen, daer hij dat heylige habijt der religye ende oerde selver annam, mit groter volstandicheyt alle sijn leven lang, ende is ten lesten aldaer gestorven ende begraven int jaer Ons Heeren M ende VIII, nadat hij dat bisdom mit groter eeren hadde berecht ende geregeert XIIII jaer.