Faems weer-galm

[p. 74]

Snel-dicht

Laudari parum est, sed multum à Laudato: Cicero

OFt eenen armen Smit van yser
U geesticheyt ten hooghsten prees
Sal iemandt daer-om wesen wyser
Als hy 't niet anders en bewees?
Neen: maer die hoogen lof wilt achten
En ont-fanght tot een bewys
Van sijn wysheyt, moet hem wachten
Van die wyser syn als wys,
Soo wordt hy by wyse lien
Voor wys dan oock aen-gesien.

Op den selven sin.

DIe van sijn eygen reën geen ant-woord' en can geven
En heeft voorwaer niet veel gelesen oft geschreven,

Want sonder wetenschap van t'gen' men seggen wil

Brenght maer verwarringh by, krakeel, twist en geschil

Uyt drucksels van verstandt vol ydel sinn'lyck-heden
Die loopen ongetoomt en buyten alle reden,

Als daer de kennis en de wetenschap ontbreckt

T'is d'waese ydelheyt die buyten kennis spreckt,

En oordeelt van het gen' hy beter soude seggen
Had' hy te wetenschap, om claerder uyt te legghen,

T'is grooten loff en eer ghepresen en bemindt

Te syn, van die den loff door wetenschap verdient,

Het is verachtelijck te worden hoogh ghepresen
Van die de saecke niet en kennen in haer wesen,

[p. 75]

 

Waer-in den lof bestaet, maer t'is een groot vermaeck

 

Ghepresen en ghe-eert te sijn van die de saeck

 

Verstaet en selver kent, dus is't een sot vermeten

 

Te prysen dat-men niet en weet, oft noyt sal weten

 

De crachten van de konst, die prysens weerdich is,

 

Waer van d'onwetentheyt geen vast ghetuygenis.

Anders.

SChoen-makers oordeel gaet niet veerder als den naet
En daer-om is het quaet een oordeel uyt te spreken

Van eenighe ghebreken.

Die m'inde wercken siet, en men verstaetse niet,
De kennis can by ons oock sonder oordeel wesen
Van t'gen' men selfs verstaet, maer niet van t' gen' gepresen
Ghe-eert wordt en geacht, en buyten onse macht

Van oordeel wordt verheven.

Die goede kennis draeght, can sonder oordeel leven.