Alexander del Garde
Beldt-houwer van Bolognien.
DE Konst van Beldthouwen is een stilswijghende werck, verthoonende altijdt den selven schijn tot dat een stoute handt t'selve breckt oft door een accidentael ongheluck vergaet. Dit stilswijghende werck oft schijn van leven dringht soo diep inde beweghinghe van het Menschen ghemoedt dat sy de cracht des verstands schijnt te boven te gaen, ick segghe de cracht des verstandts om dat het verstandt al menichmael versuft staet, aenmerckende den levenden aerdt en naturelijck wesen die de Konst in een steenen beldt can verthoonen, d'welck menichmael het leven bedrieght, om dat het sijn selven als het leven draeght. En ghelijck de welsprekentheyt is een deught van onverganckelijcke volmaecktheyt, die het naeste bestaet aende wetenschap ende den luyster en verciersel is vande spraeck, soo can ick bewijsen dat de Konst van beldthouwen soo de welsprekentheyt als een diepsinnich verstandt excelleert oft te boven gaet, schoon dat de welsprekentheyt aen het verstandt vast is, want aenghesien dat een ghesneden beldt is een verghelijckinge der sienelijcke dinghen naer het segghen vanden gheleerden Socrates, ende dat de ghelijckenis is een gheschilderde reden oft sprekende beldt, t'ghene nochtans niet en spreckt maer schijnt te spreken en te leven, d'welck den levenden mensch bedrieghen can door de wonder uytwerckinghe van Konst die daer in ghespeurt wordt, soo is waerschijnelijck dat dit stom ende doodt werck (die de Konst en gheest levent maecken) door het sienelijck wesen en aerdt van leven, alle Konsten passeert en door haer onverganckelijcke volmaecktheyt de wetenschap vande gheleerde versuft maeckt, die selden begrijpt de wonder perfectie van dese lof-rijcke Konst daer den hooch-gheachten Alexander del Garde ghetuyghenis af gheeft om de aerdicheyt, suyverheyt en volmaecktheyt die in sijn beelden te sien sijn.
Bolognien en had noyt sulck een gheest ghebaert
Die hoogher vlieghen cost in wetenschap van snijden
Als Alexander, die (door jngheboren aerdt
Van gheest en Konst) het eyghen leven selfs besijden
Sijn edel Const doet staen, t'gen' niet ghenoch en is,
Midts dat sijn hooghen gheest loopt verder als het leven
T'gen' staet als een Copy by sijn ghelijckenis,
Van t'leven en Natuer, wat dienter meer gheschreven.
Auteursrechtvrij