Handtboecxken der Christelycke gedichten

[fol. 37r]

Ghebedt-Liedt.

Na de stemme van den 17. Psalm:
Aensiet Heer 't recht van, &c.

SAl niet mijn herte sijn bereyt,

Om mijnen God met sang te prijsen?
Sal niet mijn mondt hem eer bewijsen,
En loven sijne goedicheyt?
Wel op mijn ziel en mijn ghedachten,
Looft doch des Heeren Name goet,
Lof singet hem met Psalmen soet,
En wilt sijn daden recht betrachten.

Vervult, o Heere mijn ghedacht,

Laet my vol zijn van te bemercken,
V groote wonderlijcke wercken,
V heerlijckheyt en uwe macht:
Laet my in uwer volheyt weyden,
En singhen uwen lof verblijdt,
Leer my doch bidden t'aller tijdt,
En wilt my op u wech gheleyden.

Weest mijn toevlucht, o Heer alleen,

Leert my u lof inwendich singhen,
Op dat mijn herte mach volbringen
V dienst, met u volck hier gemeen:
Wilt my u goetheyt niet weeren,
Neemt niet wech u ghenade groot,
Maer staet my by in aller noodt,
En wilt 't Geloof in my vermeeren.