Bruylofts-Liedt,
Na de stemme:
Sal ick noch langer met heeten tranen, &c.
TSa nu wel aen ghy Bruylofts Gasten,
Handelt van vreuchden, weest nu verblijdt,
Wilt eten drincken, wilt vry toetasten,
Laet druck verdwijnen, 't is nu den tijdt,
Met Bier of Wijn, wilt vrolijck zijn,
Wilt vrolijck wesen laet droefheyt staen,
't Is doch om uwent wille al ghedaen.
Wilt al te samen van vreuchd' ontspringen,
Verhevet hier u stemmen claer,
En wilt met my eendrachtich singen,
Tot lof van dit vereende paer,
Die beyde nu, met liefd' en trou,
Die beyde nu in deuchden zyn vergaert,
En met ghenegentheden wel gepaert.
Wie soud' doch connen wel bewijsen,
De deucht en eer van desen staet?
Wie soud' hem doch ten vollen prijsen,
Die allen lof te boven gaet?
Gheluckich dan, moet zijn den Man,
Geluckich dan moet wesen yeder een,
Die hare dagen hier wel in beste'en.
Bruydegom, Bruyt wy tot u keeren,
Wy wenschen u in desen staet,
Dat u gheluck steedts mach vermeeren,
En dattet nimmer u qualijck gaet:
Voorspoet en vre'e, zy u oock me'e,
Voorspoet en vrede in eer en deucht,
En al wat dat ghy van Gode wenschen meucht.
Oorlof hier me'e ghy nieu ghetrouden,
Die nu van herten u wel vernoecht,
Wilt dit altijdt voor waerheyt houden,
Dat Godt u beyde heeft t'saem ghevoecht:
Neemt dit ghesanck, van ons in danck:
Neemt dit in danck Bruydegom en Bruyt,
Want het van my uyt reyner liefden spruyt.
|
|
Auteursrechtvrij