Officia Ciceronis, leerende wat yeghelijck in allen staten behoort te doen, bescreuen int Latijn

Vant beraet int verkiesen der dingen.
Het iii. Capit.

Panetius seyt dattet versinnen oft ouerwegen vant beraden, driederley is. Vvant men twijfelt oft tgene daermen hem inne beraet eerlijck is om ghedaen te werden, dan oft schandelijck is: In welck ouerweghen, tghemoet dicmael in contrarie meyninge getrocken wert. Ooc mede ondersoect ende beraet men hem of tgeen datmen bestaen wil, ooc bequaem is om den orbaer ende vrolicheyt te vermeerderen: oft tot rijcdom, macht ende name mach vorderen: om hem selfs ende zijn vrienden te mogen helpen. Vvelcke beradinge al tzamen int ouerleggen vanden orbaer staet. De derde maniere van twijfele is, als tgene dat nut schijnt, teghen d'eerbaerheyt scijnt te vechten. Vvant als de

[fol. 4v]

profijte aen deen zijde schijnt te trecken, en d'eerbaerheyt aen dander zijde schijnt te roepen, soo wert het ghemoet int beraden ghedeylt: ende is sorchvoudich int twijfelachtighe ouerlegghen. In dese deylinge (hoe wel dattet een groot ghebreck is, yet int deylen ouer te slaen) zijn twee dingen vergheten. Vvant men placht niet alleen te ouerlegghen, welck eerlijck oft schandelijck is: maer ooc welck van twee voorghestelde eerlijcke saken, het eerlijcste is: soo mede welck van twee voor ghehoude nutte saken, het nutste is. Alsoo vintmen datmen tgene hy aen drien achtet gedeylt te werden, aen vijuen behoort te deylen. Daeromme staet eerst te ouerlegghen van d'eerbaerheydt, ende dat op twee manieren: daer na (op gelijcker wijsen) vanden oorbaer: ten laetsten de verghelijckinge vant eene teghens het ander.