Datmen de zeeden der gheenre diemen weldaet bewijsen wil, eerst wel aenmercken sal.
Het xviii. Capit.
Doch, ouermidts men hier niet en leeft onder volmaecte menschen noch volcomene wijsen, maer met alsulcke daert al seer vvel mede te vvercke gaet, als si maer eenen goeden schijn der duechden in hueren wandel draghen: soo staet ooc te aenmercken, datmen gheensins yemandt (in welcken eenigen spoor van duecht beuonden wert) en behoort te versuymen. Also is een yeghelijc die met dese sachte en goedertierne duechden, als bescheydenheydt en maticheydt, verchiert is, alder meest in eeren te houden, oock met de gherechticheydt daer nv veel af gheseyt is: want een vrome ende grooten moet is veel tijts ooc wel wat vierigher in eenen man die noch niet volcomen noch geheel wijs en is. Die voorschreuen duechden schijnen eenen goeden man meer aen te gaen: Maer dees dinghen aenmerctmen inde zeden.
Auteursrechtvrij