Officia Ciceronis, leerende wat yeghelijck in allen staten behoort te doen, bescreuen int Latijn

VVat het officie is vanden ghenen die in ghemeyn regimenten zijn.
Het xxx. Capit.

⁺Soo wie dan tgemeen goet regeren, sullen moeten twee leeringhen van Plato

+ Tgemeene profijt bouen eygen bate te soecken is grootmoedicheyt.

[fol. 33r]

weten en verstaen. Het eene is dat si der gemeenten oorbaer alsoo voor ooghen moeten hebben, datse (haer eygen bate achter rugge stellende) in alle haer doen ende laten, niet anders dan tghemeen weluaert en soecken: het ander is, dat si tgeheele lichame des gemeene weluaerts also besorgen, dat si het eene deel beschermende, de andere deelen niet en verlaten of versuymen. Aldus moetmen sich inder regeringhe draghen ghelijck als in voochdije van onmondige kinderen: daer en soectmen den oorbaer niet vanden ghenen die de sorge aenghenomen heeft: maer vanden genen diemen te besorghen heeft, dats vanden kinderen: soo moetmen alle dinghen alleen strecken tot den oorbaer van tghemeen weluaert. Maer als yemandt het eene deel der burgeren behulpelijc zijnde, het ander deel versuymt, soo brengt hy d'alder schadelijcste verderffenisse inder stadt, als oproer ende tweedracht: waer wt dan compt dat sommighe tghemeen volc aenhangen: andere volghen de meeste ende machtichste vander stadt: soo datter weynighe blijuen, die tweluaert van de gheheele burgerije voor ooghen hebben. Hier wtsproten tot Athenen groote twisten ende partijschappen: ende en baerde ooc binnen ons vaderlant Romen, niet alleene groote op-

[fol. 33v]

roeren, maer d'alder doolijcste burgerlijcke oorloghen. Welcke ghemeen verderffenissen, een vroom, oprecht staetwaerdich burger behoort te haten ende te vermijden: so dat hy hem selfs geheelijcken tot het gemeen weluaert ouergheuen sal: daer hem noch rijcdommen noch macht en betaemt te soecken: maer tghemeen goet also voor te staen, dat hyse al tsamen nut ende behulpelijck sy. Noch hy en sal oock niemandt door valsche beschuldighinghen inden hate des volcx brenghen maer de rechtuaerdicheyt ende eerbaerheydt alsoo voor ooghen hebben: dat hy in tbeschermen van tghemeen goet, lieuer yegelijcx viant werde, ia ooc den doot eerst ghetroost sy: dan hy tghemeen profijt ende oorbaer verlaten soude.