Officia Ciceronis, leerende wat yeghelijck in allen staten behoort te doen, bescreuen int Latijn

Vande bequaemheyt, nae tijt ende plaetse.
Het lvi. Capit.

Nv staet noch van de ordeninghe der dingen ende van des tijts ghelegentheyt te seggen. In welcke wetenscap die wetenscappe begrepen is, welc vanden Griecken Eutaxie ghenaemt wert, ende en is tselfde niet, dat wy maticheyt noemen, in welck woort mate is: maer het is een onderhoudinghe van goede ordeninghe. Ende op dat wy tselue maticheyt mogen noemen, wertse vanden Stoicienen beschreuen aldus. ⁺Dat maticheydt is een wetenschappe die alle dinghen diemen doet oft seyt op zijn plaetse can beschicken: twelck oock mede schijnt de nature ende aert van ordeninghe te zijn. Want si ooc de ordeninghe aldus beschrijuen. ⁺Ordeninge is een schickinge der dinghen bequaem zijnde nae de plaetse. Het werck behoort (segghense) tot de plaetse,

+ Maticheyt.

+ Ordeninge

[fol. 56r]

ende de bequaemheydt tot de tijt. De bequame tijt werdt in Griecx eukaeria ghenaemt, dat in onse sprake soo vele beduyt als gheleghentheyt. Alsoo dan is de maticheydt oft bescheydenheyt die ick hier vertale (so ick geseyt hebbe) een wetenschappe om yet te doen op gheleghen ende bequame tijt. Maer dit mach oock mede de beschrijuinghe zijn vander wijsheyt, daer voor af gheseyt is. Maer hier soecke ick de maticheyt, bescheydenheyt, ende dierghelijcke duechden. Daeromme dat de wijsheydt aengaet, is voor op zijn plaetse verclaert. Maer nv staet my te segghen datter dienen sal tot de eerbaer schaemte van de duechden daer af ick hier nv een wijle gesproken hebbe: ende oock mede vant goet behaghen der gheenre byden welcken wy louen ende wy mede handelen.