Den middel om bemint te werden.
Het vi. Capit.
Onder dese drie voorseyde saken, wil ic nv eerst schrijuen ende leeren vant gene dat des volcx ionste aengaet: die aldermeest gheloct wert door weldaden, oock (indien de macht ontbreect) verweckt wert door een goede wille om miltheydt te thoonen waert datmens vermochte: gemerct de liefde des volcx crachtich ghetrocken werdt door tgherucht ende vermoeden van miltheyt, van behulpelijcheyt, van rechtuaerdicheyt, van ghetrouheyt, ende van alle ander duechden die de goedertierenheyt ende vriendelicheyt van zeden aengaet. Want het ghene dat ick bequaemheyt ende eerbaerheit noeme, trect door zijn selfs scoonheyt ende nature alle mans herten: ouermits het ons al tsamen van selfs aengenaem ende behaghelijck is, ende aldermeest, als oft door de voorverhaelde duechden blinckende waer. Daeromme wy oock selfs wter naturen ghedwonghen werden die ghene te beminnen, in welcke wy alsulcke duechden vermoeden te wesen: ende dit zijn de treffelicste saken om bemint te werden, doch moghender noch wel sommige cleynder behaluen dese zijn.
Auteursrechtvrij