De Psalmen Davids, ende ander lofsanghen

Gebedt nae Eten.

Also spreeckt de Heere in't vyfde boeck Mosis, in't 8. Cap.

vers. 10. Als ghy sult gheten hebben ende versaedt sijn, so sult ghy den HEERE uwen Godt louen.

11. Siet wel toe, dat ghy des Heeren uwes Godts niet en verghetet, ende syne Gheboden niet en verachtet.

[p. 179]

HEERE Godt hemelsche Vader, wy dancken v voor alle uwe weldaeden, die wy sonder ophouden van uwe milde handt ontfangen, dat uwen Goddelicken wille is, ons te onderhouden in dit tydelick leuen, ende ons te versorgen met alle onse nootdruft, Maer in sonderheidt, dat ghy ons herboren hebt tot der hope van een beter leuen, d'welcke ghy ons geopenbaert hebt doer v heyligh Euangelium.

Wy bidden v, barmhertige Godt ende Vader, dat ghy niet toe en laetet, dat onse herten hier in desen eerdschen ende vergangelicken dingen souden gewortelt sijn, maer dat wy altijt mogen opwaerts sien ten hemel, verwachtende onsen Salighmaeker IESVM CHRISTVM, tot dat hy in den wolcken verschynen sal tot onser verlossinge, Amen.

Onse Vader, etc.