Logo DBNL
Refreinenbundel (1940)

Refreinenbundel

(1940)–Jan van Doesborch–rechtenstatus Auteursrecht onbekend

Vorige Volgende

[XCVII]

Al en geeft god geen gelt hi sent wel zijn ware

Refreyn

 
DE here die ons vander eerden gewrocht heeft
 
+ Ende met sijnen bloede ons gecocht heeft,
 
Want sijn gereet gelt dat was seer dinne,
 
Bedinct v ghi sonders die in zonden socht leeft,
5
Merct hoe ons god tzijnder glorien gebrocht heeft
 
Daer hem toe dwanc natuerlijcke minne.
 
Al sijn wi dwasen so gheck van sinne,
 
Seggende, god is ons sijn rijcke sculdich,
 
Hi heeft ons gecocht, dats tgeen dat ic kinne,
10
Op dat wi hem met herten sijn ghehuldich
 
Ende dat wi in allen lijden bliuen verduldich
 
Van dat hi ons toesendt hier en dare.
 
Gods gracie en is niemant ouertuldich vs. 13
 
Mer sijn betalinge is menichfuldich:
15
Al en geeft god geen gelt hi sent wel zijn ware.
 
 
 
Ghi versteende herten die onuersaecht zijt
 
Der wraken gods, hoe dic ghi ghedaecht zijt,
 
Bliuende vast in haer sondich leuen,
 
Slachten den sculdener die daer beclaecht zijn,
20
Seggende: geeft mi dach here, maecht sijn, vs. 20
 
Want ic hebbe seer luttel gelts om geuen.
 
Ghi sijt mi ouer menich iaer sculdich bleuen,
 
Wildi noch altoos van mi dach hebben;
 
+ V goet dat heb ick dobbel bescreuen,
25
Betaelt of ghi sult int ende beclach hebben.
 
Eylacen, tgelt is cleyne dat ick mach hebben
 
Om v te betaelne, geseyt int clare.
 
Geeft wat in mindernisse, ghi sult verdrach hebben vs. 28
 
Ende drinct met god, ghi sult goet gelach hebben;
30
Al en geeft god geen gelt hi sent wel zijn ware.
 
 
 
Dus die gods wrake in danck ontfaet
 
Verduldich te wesen sonder te spreken quaet
 
Bliuende op sint Iobs woorden alteenen.
 
Ic seg, ic en doets gode gheen verlaet, vs. 34
35
Want het claerlic ende wel bescreuen staet,
 
Hi sal ons sijn rijcke daer vooren verleenen.
 
Laet ons dan onse sonden beweenen
 
Die wi gedaen hebben van iongen kinde,
 
Wi sullen den viant daer mede verbeenen vs. 39
40
Ende schuwen daer bi die helsche allinde.
 
Ghenen beteren raet ic dan en vinde
 
Dan biechte, berou, en penitencie sware.
 
God gaf, god nam, was sint Iobs legende
 
Als hi hem seluen naect ende goedeloos bekende;
45
Al en geeft god geen gelt hi sent wel zijn ware.
 
 
 
+ Prince
 
Prince, men vinter verstaget bediet, vs. 46
 
Wanneer hem god toesendt eenich verdriet,
 
Dan sweerense menigen swaren eet,
 
Seggende, ic heb lieuer dat ghi mi verbiet
50
V glorie heere ende en moeyt mi niet,
 
Want ic en can niet wel verdragen v leet.
 
Dan vermanense gods passie, zijn bloet, zijn sweet vs. 52
 
Ende sijn martelie van iare te iare.
 
Al en is god ter stont niet te wreet,
55
Hi cant wel onthouwen, verstaet tbescheet:
 
Al en geeft god geen gelt hi sent wel zijn ware.

Vorige Volgende