mercken hoe dat die wereltsche eere te versmaden is, tot wiens begheerlijckheyt alsoo seer dat gemeyn volck gheneycht is, want de eeren worden ghemeynlijck ghegheven vanden genen die gheen onderscheydt en hebben tusschen eer ende oneere, ende die worden dickwil ghegeven om schoonheydt, om groot gheslacht oft rijckdom, oft dierghelijcke. Oock somtijts om snoode vyleynige saken, ende wordt oock dickwil ghegheven diese onwaerdich zijn, wie den anderen eer beswijset die doet dat door vreese oft hy oordeelt u, ende meynt dat ghy verciert ende gecleet zijt met de deuchden. Ende indien dattet also niet en is, soo weest sorchvoudich dat ghy moghet worden dat hy u vermoedet te wesen. Maer dat alderbest is dat ghy toeschicket alle die eere totten ghenen dien ghyse al schuldich zijdt, ende die alder eeren waerdich is. Ten is niet bequaem met hoochmoet te begheeren eenighe eere: ghelijck alst niet betamelijck en is hovaerdelijcken te begeeren die deucht, want wat isser dulder ende onsinlijcker dinck, dan dat loon uwer eeren te setten inde opinie der menschen, dewelcke alst haer belieft, die eere die sy ghegheven hebben weder na haer nemen, ende na dat gy geeert zijt u weder te onteeren. Voort, wat isser sotter dan alsulcke eere daermen af verblijt alsmense vercrijghet oft vergramt alsmense verliest. Welcke eeren dat niet waerachtich en zijn, moecht ghy hier by weten, want sy zijn ghemeyn met de alder quaedtste ende alder sondichste menschen. Noch dat meer is, niemandt en vercrijchtse overvloedigher dan die warachtighe eeren alder onwaerdichste zijn: Ende wilt overlegghen wat saligher vredelijckheydt des bequamen eenvoudighen levens af ghestelt wordt van moeyten ende rumoer des hoverdijs. Hier tegen denckt hoe vol haets ende sorgen, periculen ende verdriets dat is tleven der gheener die daer macht hebben, ende hoe swaer dattet is in voorspoedt hemselven niet te vergheten, ende hoe strenghe dattet is te staen in een slijckighe ende gladden wech, ende niet te vallen, ende hoe doodtlijcken dattet te vallen is vandt hooghe. Oock wilt ghedencken dat alle eere is ghemenghet met de alder grootste last, ende wat scherpen Oordeel des oversten Rechter sal daer wesen teghen den ghenen die hier haer selven voort setten om eer te vercrijghen: Ende die hier haer selven nederslaen, die sal te hulpe comen die barmherticheydt Godts, ende wie hemselven opheffet tot eer, die sluyt buyten die hulpe der gratie Gods. Ende wilt altijdt in uwer herten hebben dat exempel des Hoofts Christi? Wat isser na de Werelt onedeler, versmadelijcker ende oneerlijcker gheweest dan hy, hoe dat hy versmaedt heeft alle eer die hem ghedaen worden, die nochtans meerder was in hemselden dan alle eer, hoe dat hyse bespodt heeft op een Ezel sittende, hoe dat hyse verdoemt heeft doen hy gehecleedt was met dat Purperen cleedt ende met Doornen ghecroondt, ende dat hy een oneerlijcke doodt heeft vercoren. Maer den ghenen die de werelt heeft versmaet, die heeft Godt den Vader gheglorificeert ende gheeert. V glorie moedt wesen in dat Cruys Christi, in welcken oock alle salicheyt is. Waer toe ende waerom wilt ghy u selven Menschelijcke eer vercrijghen, want daer door verworpt ende versmaedt u Godt, ende die Enghelen vermaledijen u.
Auteursrechtvrij