Der Griecxser princerssen, ende jonckvrouwen clachtige sendtbrieven, Heroidum epistolae ghenaemt

[p. VI]

Den voorsichtighen H. Nicolaes Rokox Riddere en Burghemeestere der Stadt van Antvverpen, Cornelis van Gistele reuerentelijck gunt, ende vvenst Peys, ende vrede.

WAnt Eer. Heere, heer Niclaes Rokox uwer Eer^t. ghelieft heeft wyt een goet jonstich herte, my uwen simpelen dienaer, weldaet ende behulpicheyt te doene, sonder daertoe met eenighe voorgaende weldaden oft diensten verweckt zijnde: So hebbe jck my dicwils versint hoe ende in wat manieren dat ic dancbaer soude cunnen gewesen, hebbende voor oogen ende ouerdeckende dat onder de redelicke creaturen niet en is verworpender noch leelicker, dan besmet te zijne metter note

[p. VII]

van ondanckbaerheyt, gelyck tselfste den Ethniken ende Heydenssche luijden wyter naturen kennelick is geweest, also men wyt hen schrijuen merckelicken can bevinden: ende onder anderen so is my voor oogen gecommen tseggen van Ausonius als hy seeght.

Ingrato homine terra nil peius creat

Jae die van Perssen leestmen datze de ondancbaerheyt sulcx hebben gehaet, dat geheel Perssen duer wat met publicken edicte gecaueert, datmen den ondanckbaren persoonen wettelicken van ondancbaerheyt verwonnen zijnde capitalicken ende jnt lijf castijen soude. Omme dan te ontgaene de smette van ondancbaerheyt, So jst dat jck onder protectie van uwer Eer.^t laete jn drucke wytgaen xij. Responsijfue brieuen, by my in dichte ghestelt, ende

[p. VIII]

eertijts noyt ghemaeckt noch gheschreuen zijnde, corresponderende op zekere andere brieuen Heroidum van Ouidio jnt Latine beschreuen, eenighen tijt geleden by my in dichte ghestelt, uwer Eer^t biddende dat ghyze voor een gratuiteyt ende teeken van dancbaerheyt wilt aenveerden, ouerdenckende den Griecken Hemistichium: Καί μικροις χαρίς μεγάλη hoc est: Est & in paruis gratia magna rebus. Ende dat niemanden en behoort qualicken afgenomen te wordene, als hy wt een goet hert doet dat hy can, ende na zijn vermuegen volgende tgene die hem God gegunt heeft, ghelijck Cicero een Heyden menssche tselffte ons in Officijs betuygt, ende Christus ons leert⁺ jnt exemple van het arme weeuken, haer betuygende dat zij met heure

+ Luc.21

[p. IX]

cleyne ghifte meer deught gedaen hadde, dan de rijcke Phariseen met hen houaerdige ghiften. Nietmin hoe cleyne dat dese mijne dancbaerheyt in haer seluen metten waerheyt can gezijn, So salze gratieuser wesen jngevalle dat uwer L. de selue wilt estimeren wt den goede jonsticheyt van mijnder herten, dwelcke anders niet en begeert, dan uwer Eerⁿ onderdanicheyt met eerlijcke dancbaerheyt te bethoonen. Hopende oock bouen al, dat desen mijnen aerbeyt den goeden luyden te aenghenamer sal wesen, als zij jnt beghinsel vanden zeluen selen bevinden dat dese tweelf Responsijue onder uwen name ende protectie die liefghetal is worden wtgegeuen. Ende jc meyne datse den gheleerden luyden te meer solen behagen wt desen aenzien

[p. X]

ende respecte, datze getrocken ende ghemaeckt zijn wt diuerssche oude Poetrien conformelicken metten zeluen ouden jnuentien dienende onder tdexele van gefingeerde dinghen tot onderwijs vanden gemeyne man, die wt den jnnthouden vanden voorszeide Epistelen ende Responsijuen hen mogen houden voor gewaerschouwet, omme te schouwen so vele alst in hen is de vierige strale van Venus, de welcke menigen rustigen ende edelen man ghebrocht heeft in verdriete, ghelijc tselfste is blijckende, als in eenen spiegele wt den jnnehouden vanden hier naervolghende Epistelen metten Responsijuen.

Anders op dit pat noch langere en wille jck uwer Eerⁿ. met lange schrijuen niet verhouden van zijne affairen ende administratie van den

[p. XI]

Regimente deser Stadt, dan dat jck wt jnnicheyt mijnder herten bidde God almachtich dat hy tot welvaert vande stadt van Antwerpen, uwer Eerⁿ. wilt bewaren in goede gesontheyt ende voorspoet van uwe Edele couraige, mijnen persoon ende simpele vermogen onderworpende tot alle diensten ende ghehoorsaemheyt vande seluen uwer Eer^t. Datum Tantwerpen opten ix dach van Meye. 1559.