Piksjitten op Snyp

Haadstik 92
In granaat yn de reet

It is sawat twa oere as de bel giet. It skarminkel is yntusken foar de twadde kear wekker wurden. Se leit foar de televyzje en freget De Grutsk it himd fan it gat. No, by deiljocht, liket se noch meagerder. As de sinne troch de finsters skynt kin er gewoan troch har hinne sjen.

De Grutsk docht de doar iepen, en begroetet de freondinne fan De Fryd. Ek in pracht fan in ropfrommes. Se liket op in dichteresse út it âlde lân dy't der ek útrint, kwa persoan en wis wat de gedichten oanbelanget. De frou rint daalk nei it skarminkel en jout har de klean. Der sit ek in lyts huodsje by mei in brede râne. Se besiket út te finen yn hokker kit it skarminkel wurke hat.

De freondinne fan De Fryd flokt út en troch ferskriklik, want it is allegearre by de beesten ôf. Se is yn feite opkocht troch de geile maffia, it paspoart hawwe se ynnommen, en doe moast se tsjinst dwaan foar âlde en nije esemmers dy't noch altiten kikke op de ferhalen út de kampen. Dêrom wie se ek kealskeard. Oaren waarden helendal kealskeard, ûnder en boppe. Dy moasten har folslein foardwaan as lytse famkes. De figueren dy't derop foelen hearden by de pedofammefylgroep. Doe't De Grutsk dat hearde bewearde er dat se wat him oanbelanget by sokken de hele rotsoai der ôfsnije mochten. Se moasten se in granaat yn de reet stekke en it soadsje ta ûntploffing bringe. Dat soe de iennichste remeedzje wêze. De freondinne fan De Fryd gruist om syn wurden, en dan seit se dat se eins oars net as gekken tsjinkomt yn dy wrâld. Neffens har steane de trije toerflets stiif fol fan soksoarte fan aktiviteiten.

It Roekenêst dêr't De Grutsk sels wennet herberget de studio dêr't it skarminkel yn wurke, en der moat ek noch in romte wêze dêr't se de sintrale fan de praatboksen en de hite telefoannûmers in plak jûn hawwe. Dêr wurde ek films makke, en fideo's net te ferjitten. De

[p. 313]

Grutsk opperet dat it fêst syn buorlju wêze moatte, want it giet dêr soms heislik omwei. Se sjitte út en troch de kûgels yn de muorre, en de jûns dêrfoar skeaten se as gekken opelkoar doe't se it skarminkel sochten. Ek út de flet njonken him.

Fierder wol de freondinne fan De Fryd hawwe dat it yn de oare tuorren net folle better is. It Eksternêst stiet bekend as in bastion foar pedo's en it Kaënêst is benammen bedoeld foar de learfanaten. Eins kin elke aparte smaak wol yn ien fan de tuorren honorearre wurde. Se hat sels ris in klant hân dy't allinne mar spuitsje koe as se in revolver tsjin syn harsens hâlde. In laden wapen fansels. Op it lêste eagenblik moast se dan yn in baal strie sjitte. Hy hie trije fingers yn har kut en fierder holp er himsels. Nei it twadde skot skeat er faak sels ek. Hawar, men kin it net sa gek betinke oft it komt foar yn de wurklikheid.

De Grutsk nimt him foar en rin ris even by syn buorlju del. Miskien kin er De Frou út de binnenstêd op in idee bringe, en sil se einlings ris út harsels springe kinne. As antwurd op har briefke kin er miskien soks útstelle.

Om sa likernôch trije oere sette it skarminkel en har begeliedster ôf. It neaken frommeske is folslein feroare. Nimmen sil har werkenne. De Grutsk hat wat ferteld oer syn konfrater, neifolger en albino út de binnenstêd. It opropfrommes seit him ta dat se har der wol mei rêde sil. Miskien kin se in appèl op syn kristlike achtergrûn en gefoel dwaan. En fierder hat se noch heel wat middels mient se. Se glimket, en laket dan har tosken bleat. De Grutsk knikt. Ja, foar sokke tosken giet elkenien op knibbels lizzen. Hy winsket it skarminkel alle gelok fan de wrâld en bliuwt yn de doar stean oant de twa froulju yn de lift ferdwine.