Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XXIII.

 
Die tijt ghevet ons ten goede spoet
 
Ende wrachten wi metten spoede goet
 
So mochte wi verwinnen
 
Ende ware wi dan in hoeden vroet
5
So worden die onvroede behoet
 
Die hem noch niet en bekinnen
 
Want si ne weten wat sij minnen
 
Dus dolen wi in allen staden
 
Nu moete ons god beraden.
 
 
10.
Ons vechten ane de kere seer
 
Ende werde wij metten zere keer
 
Soe moete wij keer doen sterven
 
Verstonde wij der minnen ghehere gheleer
 
Ende worden wi mettien ghelere gheheer
15
Wi souden minne verwerven
 
Ende in al hare rijcheit erven
 
Diere wij nu al te lange derven
 
Te onser groter scaden
 
Nu moete ons god beraden.
 
 
20.
Wi hadden crachte groten noet
 
Dat wi onse node groot
 
Met crachten mochten verdriven
 
Die ons doen wederstoet ter doot
 
Sloeghe wi met dode wederstoet
25
So en mochte ons niet ontbliven
 
Wine souden minne genoech gheriven
 
Ende ieghen alle vremde verstiven
 
Die ons mochte verladen
 
Nu moete ons god beraden.
 
 
30.
Die genoech der minnen rike wijct
 
Ic segge dat hi bi wike rijct
 
Dies gevet trouwe orconde
 
Want hi hare so ghelike blijct
 
Ende so een met dien blike ghelijct
35
Dat men se beide een vonde
 
So dat se gheen sen ghesceiden en conde
 
Hine woende in honghere van minnen gronde
 
Met allen vollen zaden
 
Nu moete ons god beraden.
 
 
40.
Die dor der minnen hoeghe poeghet
 
Wat hi mettien poeghe hoghet
 
Dat werct hi openbare
 
Want hijt met allen ghetoeghe doeghet
 
Ende so met vollen ghedoeghe toeghet
45
Dat hi de minne ende al haer ware
 
Metter minnen minne ane stare
 
Ende met volre vriheit sonder vare
 
Hare diepste gewat moghe dore waden
 
Nu moete ons god beraden
 
 
50.
Haddic mijn hoege gheslachte bedacht
 
Ic hadde edelen gedachten gheslacht
 
Ende mi der minnen al ghegeven
 
Gheheel met aller machte pacht
 
Ende vercreghe mettien pachte macht
55
In minnen nature een cleven
 
Soe mochtich minne met minnen leven
 
Dat mi te langhe nu es onbleven
 
In minen nederen daden.
 
Nu moete ons god beraden.
 
 
60.
Men vendet in minnen sale dal
 
Die dan vendet in dien dale sal
 
Die es van rike sinne
 
Sint minne mi ierst quale beval
 
Wie mi iet el bevale mi qual
65
Quale neme ic vor alle ghewinne
 
Want ict mijn naeste leven kinne
 
Sint mi te doelne bevolen heeft minne
 
In clemmene ten hoochsten grade
 
Nu moete ons (god) beraden.
70.
Die ghereet steet te bevane waen
 
Hi sal met hoeghen wane bevaen
 
Die minne met minnen werken
 
Ende soe met stoerme te ghestane gaen
 
Ende minnen met doregane ghestaen
75
Ende werden even sterke
 
Dus nae dat ict gemerke
 
Dit es daer toe roept de heileghe kerke
 
Hen allen dies hare ghestaden
 
Nu moete ons god beraden.
 
 
80.
Ons naken van minnen vare baer
 
Hets recht dat ons van minnen verbare vaer
 
Dies wij de minnen versinne
 
Die ons ghevet so claer hare waer
 
Ende met allen ghehelen clare waer
85
Leret al hare hoochste costumen
 
Dies wij ons selven gherne rumen
 
Cunne wi der waerheit vremde tumen
 
Jeghen der minnen gade
 
Nu moete ons god beraden.
 
 
90.
In alder kerken clerken gewerc
 
Soe segghic dat en merke clerc
 
Hoe scone het den genen stoede
 
Die in minnen wrachten sterke werc
 
Hi worde so met dien werke sterc
95
Ende verwonne sonder moede
 
Hi soude in minnen orewoeden
 
Verberren in hare diepste vloede
 
Ende versmelten alse caden
 
Nu moet ons god beraden
 
 
100.
illustratie Wi sijn te gheruum in onse hoede
 
Ende nemen troest ten iersten spoede
 
Dies moet ons de minnen versmaden
 
Nu moete ons god beraden.

Vorige Volgende