Print Pest-spieghel(1602)–Zacharias Heyns Vorige Volgende 3. Handeling. 2. Verschoning. Wolfs aert. 'Thert vol vreesen. Tis t'onsent noch al goedt, dus ben ick wel te vreden Ten sterft als noch ontrent mijn huysingen oock niet, Hoe wel men hier en daer veel sieck en sterven siet Doch ick gebruycke raet, de siecken oock ick schouwe Want ic van sulc besoec voorwaer niet veel en houwe Het suchten is de spijs die m'op de tafel set, De warme tranen me den dranck van sulck banquet De sieckte selfs is 'tgheen daer zy ons me betalen Ick wille mynen buyck vol Wijns veel liever halen Al waermen niet en treurt, al waermen danst en springt Al waermen vrolijck is en lustichlijcken singt Daer in voorwaer so is al veel te grooten keure [fol. Bvir] 'Thert vol vreesen. Holla mijn Heere, staet, ghy raect hier voor de deure Van Goed aert wiens vrou cranck van de Pest leyt. Wolfs aert. Ist waer? hoe comt dat ghy so lange daer me beyt? Ghy doet my voorwaer met angst en schricke beven. 'Thert vol vreesen. Neemt uwen Reuckbol, stracx den neus daer med' ghewreven. Soo word' u herte weer en 'tlichaem me verquickt. Wolfs aert. Ghy hadt my daer 'tghemoet te seer verschrickt, Laet ons liever sonder beyden by tyde, Van hier wijckende gaen op d'ander zyde, Tis best datmen myde // alsulcke plaghen. 'Thert vol vreesen. Al waerder yemants cranck van mijn beste magen, K'en soud' hem selfs niet comen soo naer, Ick hebbe om sterven al veel te grooten vaer, Jae wensche dat ick waer al wijt van hier gheseten. Wolfs aert. So langhe als wy noch wel moghen eten, Ende dat het ontrent onsent niet en is besmet Soo dunckt my dat ons gantschlijck niet en let, Na Doctoren Wet willen wy leven Wy sullen het buycxken zijn becomste gheven En houden de aderkens altijdt even vol. Soo datter gansch niet en sal wesen hol Daer haer de Pest sou connen versteken: 'Thert vol vreesen. Y daer hoor ick een man na mijn herte spreken Maer willen wy niet by tijts vande straet? Wolfs aert. My dunckt het is wel den alderbesten raet, [fol. Bviv] Gaet ghy voor en laet den cost bereyden. 'Thert vol vreesen. Wel Meester. Vorige Volgende