Logo DBNL
Gedichten (1981)

Gedichten

(1981)–Willem van Hildegaersberch–rechtenstatus Auteursrechtelijk beschermd

Vorige Volgende

+C. Van ghenoechten.

 
Een vraghen leide mi te voren
 
Een edel joncheer wel gheboren,
 
Wat die hoochste punte waer,
 
Desmen ter werlt nemet gaer,
5
Van al dat ons nature gheeft.
 
Hi sprac: ‘Die dit verwonnen heeft,
 
‘Die machs hem hoechlijc beroemen,
 
Tis een punt van groten vromen.’
 
Dus heeft die joncheer mi ghevraecht.
10
Isser yemant, diet behaecht
 
Dit te antwoerden nader tale,
 
Ic gouts hem utermaten wale,+
 
Want die sin is mi verborghen.
 
‘Willem, leeft hier of buten zorghen.
15
Condi twaer ontbinden niet,
 
Soe willics maken een bediet
 
Nader waerheit wel ghemeten.
 
Wattie joncheer wil van u weten,
 
Dats Ghenoecht, ic wetet wael.
20
Ghenoecht gaertmen al te mael
 
Waermen comt ter werlt wijt;
 
Ghenoecht is leven sonder nijt
 
Entaer toe vry in hoer behaghen;
 
Ghenoechte en wil gheen nijt draghen,
25
+Ghenoechte is een edel zaet,
 
Ghenoechte is leven sonder quaet.
 
Wye dat zaet der boosheit lesen
 
Die moeten buten ghenoechte wesen:
 
Hier om wil ic ghenoechte prysen.
30
Conde my yemant beter bewisen,
 
Ic bleefs daer by mijn leven lanc.’
 
- ‘Meester, vrient, ic weets u danc,
 
Dat ghi mi hebt aldus ontladen:
 
Ic bin een weynich bet beraden
35
Dan ic hier te voren was.
 
Blijft ghenoechte in een pas
 
Te Gode, ter werlt, hoemense keert,
 
Soe hebdi zeker wel gheleert,
 
Ende elcman machs gaerne bi u bliven.
40
Nu heb ic aldus horen scriven,
 
Daermen leest die waerheit claer:
 
Ghenoechte der werlt is zielen vaer
 
Enten lichaem wel bequame.
 
Al heeft ghenoechte mer een name
45
Tot deser werlt in hoer ghewout,
 
Men machse deilen menichfout,
 
Te Gode, ter werlt, in allen zaken!’
 
- ‘Willem, wildi ghenoechte laken,
 
Wat zaken sullen wy prysen dan?
50
Onghenoechte niet en can
 
Enighe vreuchde ter werlt gheven
 
Of hier na int langhe leven:
 
Onghenoecht is Gode onmaer.
 
Suchten, karmen ende misbaer
55
Heeft onghenoechte in hoer zeden;
 
Nijt ende onverduldichede,
 
Wanhope, die alre meeste hinder,
 
Dit sijn der onghenoechten kinder,
 
Daer si den mensche mede besit,
60
Dat hi in zonden wert besmit,
 
Des goede ghenoechte niet en dade.’
 
- ‘Meester, vrient, by wisen rade
 
Machmen ter werlt comen voert.
 
Al is ghenoechte een edel woert,
65
Men macht nochtan argueren.
 
Soe wye des lichaems ghenoechte gheren,
 
Dat en mach voer Gode niet volstaen;
 
Die ziele kiest een ander baen,
 
Daer si uut ghevloten sy,
70
Mit ganser ghenoechten wandels vry,
 
Als God in allen menschen biet:
 
En dede die ziel, soe waerwy niet.
 
Tlichaem is ter aerden ghevoecht,
 
Dat gheert altoes ter werlt ghenoecht,+
75
Goeden dranc ende edel spise,
 
Ghenoechte in menigherhande wise,
 
Al waert al jeghens Goeds ghebot.’
 
- ‘Willem, ic mach u schelden sot,
 
Dat ghi den pat soe nauwe neemt.
80
Souden wy van Gode worden vervreemt
 
Om goede ghenoechte sonder toern,
 
Soe waren wy beter ongheboren:
 
Wat dochte dan smensche gheslachte?
 
God selve den mensche wrachte
85
Ghebreekelijc by naturen,
 
Vallen, rysen, oec bezuren
 
Mit penitenci vanden zonden.
 
Moghen wy beter sijn ghevonden
 
Dan die goet noch quaet en pleecht,
90
Ende altoes een borden dreecht?
 
Ghenoechte is al des menschen leven,
 
Ende God die selre loon of gheven
 
Daermen goede ghenoechte pliet,
 
Op dat sijn lof daer in ghesciet;
95
Want goet gheselscap ende ghenoecht
 
Is een wortel alre duecht.
 
Mit onghenoechte vintmen selden
 
Volc yet langhe tsamen helden
 
Sonder toern of ghevecht.’
100
- ‘Meester, ghi hebt wel berecht,
 
Nochtan wil ict u proeven bet.
 
Waer elc op goede ghenoecht geset,
 
Soe waer ghenoechte gaer volcomen.
 
Nu machmen ander ghenoechte noemen,
105
Die niet seer en staet te loven
 
Voer den meester van hier boven,
 
Die selve wel kent gherechtichede.
 
Men pliet ghenoechte tot menigher stede
 
Mit overvloedicheit van leven,
110
Daer ander sonden wel nut zweven
 
Onder tfolc al hier op aerden,
 
Diemen prijst van groter waerden
 
Mitten ghenen diese hantieren:
 
Loghentael ende valsch visieren,
115
Dobbelen, drincken, vloecken, zweren.
 
Elc heeft ghenoecht in sijn begheren,
 
Ende int volbrenghen veel meer.
 
Den hoghen val van Lucifeer
 
Hebdi wel dic of horen lezen,
120
Sel hoveerde wel ghenoechte wesen,
 
Daer Lucifeer by nedergleit
 
Totter ewigher zericheit?’
 
+- ‘Trouwen, Willem, dat en seg ic niet:
 
Ghi hebt mi dit soe wel bediet,
125
Ic blijfs by u al sonder letten.
 
Die hem tot sulker ghenoechten setten,
 
Die moeten daer na loen ontfaen.
 
Ghenoecht is edel int verstaen
 
Van goeden luden menichfout,
130
Die inder werlt, jonc ende out,
 
Hoer ghebet mit ynnicheit
 
Te male an Gode hebben gheleit,
 
Als Minrebroeders, Jacopijn,
 
Tsairtroysers ende Augustijn,
135
Ende ander goede begheven oerden,
 
Die in wercken ende woerden
 
Gheerne dienen onsen Heer
 
Mit goeder ghenoechten in allen keer,
 
Ende horen schepper node vergheten.’
140
- ‘Meester, vrient, tis wel ghemeten
 
Dat altoes evenlijcke weecht:
 
Hier an hebdi wel gheseecht,
 
Nochtien wil ict u bet verclaren.
 
Die wise setten hoer begharen
145
In ghenoechten altemale;+
 
Ghenoeghen is die hoechste zale,
 
Daer die ziel in rusten mach;
 
Ghenoeghen maect ons verdrach,
 
Ghenoeghen doet ons Gode minnen
150
Ende alle rechte ghenoechte kinnen.
 
Soe wye gherechte ghenoechte smaect,
 
Dat is die gheen die Gode naect,
 
Want hi sellen wel beraden.
 
Wye hem ghenoecht is al ontladen,
155
Ende hem en brect noch dit noch dat.
 
Ghenoeghen is die hoochste scat
 
Mede te comen te hemelrijck,
 
Daer ghenoecht sel wesen ewelijck
 
Sonder pine, sonder vaer.’
160
- ‘Willem, ghi spreect die waerheit claer,
 
Naerre en weet ics niet te vinden.
 
Ic hoer u sulke glose ontbinden,
 
Dat ic mi wil ghenoeghen laten;
 
Want goede ghenoecht in sulker maten
165
Doetet hemelrijc verwerven,
 
Daer alle ghenoechte sel op ons erven.

Vorige Volgende