Horae Belgicae

¶ Nr. 86.

Ic sie die morghensterne,
Jesus claer aenschijn.
hi weckede mi mit liden:
danc hebbe die here mijn.

Wat is daer dat mi wecket
ende mi niet slapen en laet?
ic wil die werelt laten
ende al haer toeverlaet. -

[p. 176]

3.

Dat bin ic ridder coene,

 

een heer die voor u strijt.

 

wanneer wildi mi lonen

 

al minen arbeit? -

 

 

4.

Ghenade, here, ghenade!

 

siet aen u selves lof,

 

ic soude u gheerne dienen,

 

condic of mochtic noch.

 

 

5.

Het gaet vast aen een ende,

 

hoe gheerne waer ic daer,

 

daer ic mit claren bekennen

 

die waerheit mochte verstaen. -

 

 

6.

O siele, ghi staet so stille,

 

ghi en comet mi niet so nae,

 

dat ghi mit claren bekennen

 

die waerheit mochten verstaen. -

 

 

7.

Ghenade, here, ghenade!

 

och lieve here mijn,

 

ic soude so gheerne volbrenghen

 

den liefsten willen dijn. -

 

 

8.

Och siele, lieve siele,

 

nu doet den willen mijn!

 

boven alle gheschapen dinghen

 

suldi die liefste sijn. -

 

 

9.

Sal ic boven allen dinghen

 

die alreliefste sijn,

 

so draghe ic u op mijn wesen,

 

want here dat is doch dijn.

 

 

10.

Och dat een gheestelic herte

 

hem so becommert in deser tijt,

 

dat god of sine ghenade

 

gheen stede in hem en vint!

B. 48.