Horae Belgicae

XLVII.
¶ Een nyeu liedeken.

FOrtuyne heeft mi verbeten
Jn lijden dus gheschent
Als mijn lief mach weten
Si hout mi in torment.
wantrouwe ghi doet mi quelen
Daer ic mi toe verliet.
Met mi hout si haer spelen
Op mi en achtse niet
Haer aenschijn claer
Tscheyden gaet mi so swaer
Ay lacen lief ay my.
Scheyden moet ick van dy
Dat ick van haer nv moet scheyden
Jc blijue in drucke versmacht.
Schoon lief wilt my troost gheuen.
Het is wel in v macht
O Cupido god van minnen
Laet ghi mi int verdriet
Jck duchte ick sal ontsinnen
So ghi voor ooghen siet
Haer aenschijn claer. .
Mocht icse noch aenscouwen
Haer schoon bruyn oochskens claer.
Die bloeme bouen alle vrouwen
Haer wesen is eerbaer
Men costse mi niet ontprijsen

[p. 69]

 

Nv noch tot gheender stont

 

Mochte haer minne noch rijsen

 

So waer ick al ghesont

 

Haer aenschijn claer. .

4.

Mer lacen si slaet mi nv swijcke

 

Die suyuer maghet reyn

 

Jck en ben niet haers ghelijcke

 

Dat sie ick wel certeyn

 

O radt van auontueren

 

Gaet altoos uwen ganck

 

Mach mi gheenen troost ghebueren

 

Dat lijden wert mi veel te stranck

 

Haer aenschijn claer. .

5.

Fortuyne sal noch faelgieren

 

Ende dat in corten termijn

 

Jck sal noch vruecht hantieren

 

Jn spijt van alle dese nijders fenijn

 

Al ligghe ick onder die voeten

 

Jck sal noch rijsen wel

 

Ende mijnen druck noch boeten

 

Ondanc alle die nijders fel

 

Haer aenschijn claer. .

6.

Princersse reyn ghepresen

 

Oorlof als nv ter tijt

 

Als ick bi v alleyne mach wesen

 

So ben ick al verblijt

 

Dat ic van v nv moet scheyden

 

Jn also corten termijn

 

Oorlof tusschen ons beyden

 

Adieu die liefste mijn

 

Haer aenschijn claer.

 

Het scheyden gaet mi so naer

 

Ay lacen lief ay my

 

Scheyden moet ic van dy