Logo DBNL
Horae Belgicae (1968)

Horae Belgicae

(1968)–A.H. Hoffmann von Fallersleben–rechtenstatus Auteursrechtelijk beschermd

Vorige Volgende

LVII.
¶ Vanden regulier moninck.

1.
HJer beghinnen wi nv an.
 
Een nyeuwe liet te singhen
 
Ende singhen van eenen regulier moninck.
 
Ende van eender nayerinne
2.
Die regulier in een waerts huys quam
 
Hi vraechde wat hebdy te eten
 
Jck soude tot eender naeyerssen gaen
 
Het was mi bi na vergheten
3.
Doen hi totter naeyerssen quam
 
Hi wert seer wel ontfanghen
 
Si nam hem in haren witten arm
 
Ende si aten met malcander
4.
Doent was aender middernacht
 
Si hoorden dat clocxken clincken.
 
Staet op staet op goet regulier moninck.
 
die metten moet ghi singhen.
5.
Doen dat clocxken gheluyt was
 
Hi soude gaen inder metten
 
Och wiste dit mijn heere den abt
 
Hi soude mi seluer wecken
6.
Doen die moninc inden ommeganck quam
 
die abt die quam hem teghen
 
Bona dies bona dies ghi regulier moninc
 
Waer hebdy te nacht gheleghen
7.
Daer ick te nacht gheleghen hebbe
 
daer was ic seer wel ontfanghen
 
Men schencte mi daer den coelen wijn
 
Jc lach in mijns liefs armen
8.
Die abt al tot den moninck sprack
 
Met also soeten worden
 
Nv segt mi goet regulier moninck
 
Houden dat onse oorden
9.
Doen die moninc inder kercken quam
 
die broederen liepen te samen
 
Die een moninc al tot den anderen sprack
 
desen moninck willen wi verbannen
10.
En dat verhoorde de regulier moninck
 
Hi liet zijn capken vallen
 
Soude mi die nayersse niet lieuer zijn.
 
Mer dan mijn broeders allen
11.
Die ons dit liedeken heeft ghemaect
 
Hi heuet seer wel ghesonghen
 
dat heeft ghedaen een regulier moninck
 
Wt der cappen is hi ontspronghen

Vorige Volgende