Horae Belgicae

LIX.
¶ Van Thijsken vanden schilde

HEt is goet vrede in alle duytsce landen
Sonder Thijsken vanden schilde
Hi leyt te Delder gheuanghen
Hi leyt gheuangen so swaerlijck op zijn lijt
Die vrou al vanden scilde, si lach op hooger tinnen.
Si sach die heeren die borghers comen binnen.
Si en sach daer Thijsken haer liefste boele niet
Si en sach daer.
Ghi ruyters, ghi rouers, ghi heeren vander straten
Waer hebdi Thijsken vander schilde ghelaten
Waer hebdi gelaten die liefste boele mijn
Waer hebdi. .
Och vrouken vanden schilde
Nv en laet v niet verlanghen.
Dat Thijsken vanden schilde te Delder leyt gheuanghen.
Hi leyt. .
Dat vrouken vanden schilde, en woudes niet gheloouen.
Si dede haer paerdeken sadelen ende toomen.
Si reedt te Delder al voor dat hooghe huys
Si reedt.
Och Thijsken vanden schilde, dats bistu nv hier binnen.
So steect v hoofdeken al wt der hoogher tinnen

[p. 89]

 

Laet mi aenschouwen v fiere ionghe lijf

 

Laet mi. .

7.

Thijsken vanden schilde en liets hem niet verdrieten

 

Hi liet zijn hoofdeken ter hooger tinnen wt schieten.

 

Hi liet haer aenschouwen zijn fiere ionghe lijf.

 

Hi liet.

8.

Thijsken vanden schilde ghi en wout my niet gheloouen

 

Dat ghi bi daghe by nachte soudt laten v ruyten v roouen

 

Dat ghi soudt laten v roouen ter haluer middernacht

 

Dat ghi. .

9.

Ja vrouken vanden schilde, dat quam by uwen sculden

 

Dat ghi wout draghen dat siluer ende root gulden

 

Dat ghi wout draghen dat roode beslaghen gout

 

Dat ghi. .

10.

Och Thijsken vanden schilde, haddy dat woort ghesweghen

 

Met siluer ende roode gout had ick v op doen weghen

 

Dat v nv sal costen dijn fiere ionghe lijf

 

dat v nv sal costen. .

11.

Och vrouken vanden schilde, en soude v dat niet verdrieten.

 

dat mi die rauen die voghelen souden eten

 

Dat mi souden eten so menich clein vogelken

 

dat mi souden eten. .

12.

Och Thijsken vanden schilde, en laet v niet verlanghen

 

Jck sal v radeken met rooskens ombehanghen

 

Daer op sal rusten dijn fiere ionge lijf

 

Daer op .