Print Horae Belgicae(1968)–A.H. Hoffmann von Fallersleben Vorige Volgende CII. ¶ Een nyeu liedeken. 1. JC heb om eender vrouwen wille Ghereden so menighen dach nv segt mi scoon vroudelinge Hoe sidy nv bedacht Och wildi bi mi bliuen Ende dat segt mi nv ter tijt Want ick moet van hier Ja schoon is mijn lief Mi en lust gheen ander wijf 2. Lust v gheen ander wijflijn So draecht v herte tot mi So segghen al die lieden dat ick die liefste si die eere wil ick behouwen Tot die alderliefste mijn Ende slapen bi scoone vrouwen Ja schoon is mijn lief Daer slaept een ander bi 3. Hi nam die suyuerlijcke Al bider witter hant Hi leydese also verre Al ouer die smale padt al voor haer camer veinster daer lach de maecht en sliep die wachter op hoger tinnen Ja schoon is mijn lief Hoe luyde mer dat hy blies 4. Js daer yemant verboorghen Dat segt nv ter tijt [p. 155] dat hem die niders niet en verspieden Die bi der liefster zijt Jc sie die morghen sterre ende den dach die spruit daer by Jc hoor die vogelkens singen. Ja schoon is mijn lief daer toe die nachtegale 5. Laet singhen wat si willen. Ten is noch gheen dach So moetse god bewaren Daer ic te nacht bi lach Si heeft twee valcken oogen. daer toe eenen huebscen crans So moet ic van haer scheyden. Ja schoon is mijn lief God spaerse lange ghesont 6. Hier mede heb ic ghecosen Het is mi van herten leet Jck hebbe om uwen wille. Ghereden so menigen dach. Schoon lief laet v gedencken. Ende die trouwe die ic v gaf. Ende laet twee bruyn ooghen. op mi wencken Ja schoon is mijn lief Adieu ic scheyde van hier Vorige Volgende