Print Horae Belgicae(1968)–A.H. Hoffmann von Fallersleben Vorige Volgende [p. 256] CLXX. ¶ Een amoreus liedeken. 1. WT liefden siet Lijde ick verdriet Jc en macht ooc niet wtspreken Hoe dat si hiet diet herte doorschiet Twelc venus heeft ontsteken Noyt smert so groot Jn desen stoot Wie soude den cloot genaken Reyn roosken root Troost mi tis noot Eer ic den doot sal smaken. 2. Jck ben doorwont Sijt des oorcont Jn tshertsen gront, met liden Nochtans haer mont Ende borstkens ront Can mi terstont verblijden Jnt swerelts troon Door haren toon Spant si den croon, der vrouwen Jn desen hoon Haer dienaers loon Wie soude die scoon, betrouwen 3. Liefs woorden soet Voor ghelt voor goet Want lief bi lief moet, bliuen. Noch vintmen goet dat troosten doet Twelc liefde doet, verdrijuen Mer dees kersou daer op ick bou Js bi geen vrou, te ghelijcken. Derf ic den dou Jck sterf van rou Schoon liefken trou, moet blijcken 4. Laet hoop mijn vertrooster zijn Schoon roosemaryn gepresen soet medecijn Eer iek verdwijn So is mijn pijn, ghenesen Mer weyghert zijt Gheen meerder spijt Mijn herte dat splijt, doort deruen Vermalendijt Si vre oft tijt Jc roepe ic crijt om steruen. 5. Jst haer behaecht Eer ghi lof draecht haer si beuraecht, met smeeken [p. 257] Jc hebt ghewaecht Tsi gode gheclaecht Dus hoort de maecht, eerst spreken Loppe niet verblint Al teghen wint Oock niet en mint met ooghen Mer wel versint Eer ghi mint Eer ghi v vint bedroghen 6. Met oorlof reyn Siet int gemeyn Jc blijf alleyn in smerte Jc prijs dat greyn Jn swerelts pleyn Si blijft alleyn int herte Si is eerbaer Haer bruyn oochskens claer Al sonder maer gheschepen Een vre van haer Js duysent iaer Tblock valt swaer te slepen Vorige Volgende