Horae Belgicae(1968)–A.H. Hoffmann von Fallersleben– Auteursrechtelijk beschermd Vorige Volgende [pagina 260] [p. 260] CLXXII. ¶ Een nyeu liedeken. 1.[regelnummer] MEt eenen droeuen sanghe So claghe ick mijnen noot Het scheyden valt mi stranghe Al van dat vrouken minyoot Wt mijnen ooghen saen Vloeyt so menighen heeten traen Al om die liefste mijn die nv anders is beraen En mijn ontrou heeft ghedaen Och het scheyden doet mi pijn 2.[regelnummer] Schoon amoreuse care Jck en haddes v noyt betrout Laests spraken wi te gare Schoone woorden menichfout Och hoe was ick also bot En met mi hout ghi v spot Ja also ic aensie Laetsts vant ic die doere in slot Met een ander lief int cot Waert ghi vrolijck ende blije 3.[regelnummer] Dus vinde ic mi bedroghen Quade tonghen hebbent mi verbeent Schoon woorden al gelogen. Spraect ghi en niet en meent Ja al biden raet Door qua tonghen quaet Sijt ghi van mi verureemt Ende oock heel van mi versaet Hoe coemt dat ghi mi aldus versmaet Noeyt en heb ick met v geschimt 4.[regelnummer] Adieu schoon reyn figuere Adieu schoon eglentier Jc en can gerusten niet een vre Om v reyn violier [pagina 261] [p. 261] Och mocht ick noch eens ontfaen Eenen soen het waer gedaen Aen v schoon roode mont Och mijn lijden saen Waer dan al geheel ghedaen Want mijn herteken hebt ghi doorwont 5.[regelnummer] O edel god der minnen Cupido staet mi bi Venus discipulinnen Aen v roep ic ay my Also ghi mi doet aen schijn Oock bedroghen sal ick zijn Ghelijck Salomon seer wijs Ende ooc Absalon seer fijn Wel schoone rosemarijn Stae ick op een craeckende ijs 6.[regelnummer] Adieu adieu princesse Daer ic sin op hadde gheleyt Het was mi een droeue lesse Als ghi mi v trouwe ontseyt Qua tonghen breken wel een been En si en genesen geen Dat heb ic nv verstaen Och adieu wi moeten scheen. God die wil v wel gheleen En beschermen van alle quaen Vorige Volgende
Auteursrechtelijk beschermd Auteursrechtelijk beschermd Auteursrechtelijk beschermd
Auteursrechtelijk beschermd
Auteursrechtelijk beschermd