Print Horae Belgicae(1968)–A.H. Hoffmann von Fallersleben Vorige Volgende [p. 310] CCI. ¶ Vanden Landtman 1. LAet ons den landtman louen Met sanghe ende vruecht Want hi gaet al te bouen Om sijn loyale duecht Landouwen, sloten steden, Daghelijcx spijft ende voet Met sijn sweetighe leden Den edelen landtman goet Daert al by leuen moet 2. Hertoghen, Princen, Grauen Sullen si zijn ghespijst den landtman moet beslauen Thes recht datmen hem prijst Als heeren triumpheren En schaffen huypschen moet Men siet hem laboreren den edelen landtman goet Daert al. 3. Elck doet den landtman toren Waer hi sayt ende plant die mollen blint gheboren wroeten naert hem meest meshant die coeyen, schapen, en swijnen die comen metter spoet En doen zijn vrucht verdwijnen den edelen landtman goet Daert. 4. Vrou venus lacke dieren Die doen hem groot gequel Sijn vruchten niet en vieren Als si ligghen in haer spel Si stommelen ende si steken Al waren si verhoet Sijn coorne deerlijc breken den edelen lantman goet Daert. . [p. 311] 5. Elck besicht daer zijn clauwen Hoenders en voghels vry Men gaeter ter oeste houwen Hi en isser niet altijs by Men soude qualick ghelouen Hoe menich ontschamel bloet Trecken en teesen wt zijn schouen den edelen landtman goet Daert. 6. Dan is hi van die papen Om zijn thiende ghequelt die costers staen en gapen Om eyeren schoouen oft gelt Susters ende baghijnen Om hebben elc hen groet dus laet hi vanden sijnen den edelen landtman goet Daert. . 7. Mulstooters met haer rijuen Om kiekens koorne en vlas Connen wonder bedrijuen Die vier oordenen op dat pas Willen hem gods rijcke verleenen Met huer bedinghe soet Mer tes hebben dat si meeuen vanden landtman goet Daert. . 8. Die iaghers en serganten die zijn oock geerne verblijt Want si hem voor terwanten En boenen hebben beurijt Den molenaer vanden mele Als hi ter molen doet Schept diepe god weet hoe veele Vanden edelen landtman goet Daert. 9. Vossen fissauwen fluwijnen doen zijn hoenders en ganssen stoot die woluen wreet om schouwen bijten coeyen en schapen doot [p. 312] Wesels suypen so si pleghen Sijn eyeren onghebroet dus commet hem alle tseghen den edelen landtman goet Daert. . 10. Christus die tonser vrame Ter eeren den landtman sijn Sijn bloet ende lichame Schanc onder broot ende wijn En als hi was verresen Quam als een landtman vroet Moet in zijn hulpe wesen Den edelen lantman goet Daert al bi leuen moet. Vorige Volgende
