Milenus clachte

[p. 105]

[Dees wetten heeft Plutarchus ghesonden]

Dees wetten heeft Plutarchus ghesonden

Aenden Keyser Traianus den Potentaet,

Soo wy in zijn schriften hebben bevonden,

Schriift hy: Wijs Prince, wildy v delicaet

Verstant voeghen naer mijnen slechten raet,

Ick sal v in t'corte seynden al d'oude wetten:

Niet om dat ghyse soudt uytroepen voor t'Senaet,

Maer om in v camer op t'buffet te setten.

Want ghy voor die borghers en cadetten

Veel Loyen ghemaect hebt van diuersche saken,

Heb' ick voor v dees wetten willen maken.

D'ierste wet es, dat ghij v wel moet wachten
Van quade feyten, diemen mocht reproceren.
Want daer die Princen goet zijn, wilt hier op achten,
Sullen die vassalen hun wel obedieren:
Maer als t'hooft iet ghebreect, die leden failleren.

Ghij moet Iustitia doen in t'ghelijcke,
Weder dat v vrienden oft vijanden = zijn.
Ghij en meught faueur doen arme noch rijcke,
Weer zij subjecten, oft uyt vremde landen = zijn.
Die in t'recht persoonen aensien, tyranden = zijn.

[p. 106]

 

Ghy moet in v woorden waerachtich = zijn,

 

En ghy en meught niet te vele spreken.

 

Want die Princen die loghenachtich = zijn,

 

En in haer beloften vol ghebreken,

 

Worden van vrienden en vijanden versteken.

 

 

 

Ghy moet seer soet van conditien,

 

En sorghfuldich ouer alle zijen,

 

Om te loonen die v doen seruitien.

 

Want een ondanckbaer Prince sal God castijen,

 

En die menschen sullen hem vermalendijen.

 

 

 

Ghy moet v wachten, als voor die pestelentie,

 

Voor flatteerders, want zy verturberen

 

Die Republijcke: en in v presentie

 

Weten zy behaechlijck te flatteren,

 

En elders v fame te deminueren.

 

 

 

Wildy dees vijf wetten wel onderhouwen,

 

Ghy Potentaten, die hier staen gheschreuen;

 

Soo suldy d'inconuenienten schouwen,

 

Die de Princen dickwils bringhen in sneuen.

 

Gheen beter wet, dan een deughdelijck leuen.

FINIS.