Milenus clachte

[p. 102]

[Om dat Anacharsus soo veel malitien]

Om dat Anacharsus soo veel malitien

Inde Princen houen sach domineren,

Sondt hy dees naervolghende conditien

Aen Coninck Cresum, eer hy wilde accepteren

D'offitie die hy hem dede offereren.

Inden iersten, Cresu, soudt ghy moeten laten
Die quade coustuymen, die ghy barbaren
Ghemeynlijck hebt onder v Potentaten,
Te weten van groote schatten te vergaren.
Om dat die Princen die veel tresooren sparen,
En door groote ghiericheyt leuen vileynlijck,
Wijsheyt, en goeden raet ghebreect ghemeynlijck.

Ten tweeden soudt ghy moeten bannen,
Soo wel uyt v hoff, als uyt v compaignije,
Al die flatteurs, en gheveysde mannen,
Die v wonder wijs maken by tije.
Want een Prince die door flatterije
Hem laet bedrieghen, en beroouen van sinnen,
En can nootsaecklijck die waerheyt niet beminnen.

[p. 103]

 

Ten derden sult ghy laten den onrechten strijt

 

Die ghy teghen die van Corinthen beghint:

 

Om dieswille dat alle Princen altijt,

 

Die van d'uytlantsche orloghen zijn vrint,

 

Zijn ghemeynlijck (soomen beuint)

 

Vijanden vanden peys van haer Republijcke.

 

T'es een goet Prince, die in vrede houdt zijn rijcke.

 

 

 

Ten vierden, suldy bannen uyt uwe palleysen

 

Boosmakers, lantspeelders, en joguleuren:

 

Om dat een Prince crijght veel ijdel ghepeysen,

 

Die veel lichtveyrdicheyt hoort, en siet ghebeuren:

 

En in tijden van noode, oft als hy moet treuren,

 

Can hy hem qualijck begheuen tot wijsheyt.

 

Niet dan ijdelheyt en es t'swerelts jolijsheyt.

 

 

 

Ten vijfsten sult ghy doen ghebien,

 

Dat al die leeghganghers, en vagabonden,

 

Vwen persoon, en v hoff sullen moeten vlien:

 

Om dat ledicheyt, en luyheyt tot allen stonden

 

Wreede vijanden worden beuonden

 

Vande wijsheyt, en voorsichticheyt.

 

Door ledicheyt comt groote onstichticheyt.

 

 

[p. 104]

 

Ten sesten, suldy bannen en doen verjaghen

 

Al die muytmakers, en die loghenachtich = zijn:

 

Want als die Princen in hun hoff verdraghen

 

Menschen die oproerich, en onwaerachtich = zijn,

 

Eest een teeken dat die Prince sal clachtich = zijn,

 

En dat eer langhe zijn Coninckrijcke sal vergaen.

 

Wee die Princen die d'oproerders voorstaen.

 

 

 

Ten seuensten, soo langhe als ick sal = leuen,

 

Moet ghy my ghelouen, dat ghy my goet, noch staet,

 

Noch oock ander gheschencken groot noch smal gheuen:

 

Want corrumpeert ghy my deur ghiften metter daet,

 

Sa lick v moeten bedrieghen met quaden raet.

 

Want daer en es gheen raet die niet verveirlijck = en es,

 

Dan vande mensch die niet begheirlijck = en es.

 

 

 

Eest dat Coninck Cresus hem wilt reguleren

 

Naervolghende dees conditien voorschreuen,

 

Soos al Anacharsus hem obedieren,

 

En hem inden dienst van Crese begheuen.

 

En inghevalle neen, heeft hy lieuer te leuen

 

Als een vanden Philosophen dienaren,

 

Dan als een groff Coninck vande Barbaren.

FINIS.