Milenus clachte

[p. 143]

[Daer geestelijc en werelijc d'een d'ander beminnen]

Daer geestelijc en werelijc d'een d'ander beminnen,
Daermen met bermherticheyt doet Iustitie,
Daermen reden ghebruyct met coele sinnen,
Daermen God die wraeck gheeft vande malitie,
Daer elck ghetrou es, en van goede conditie,
Daer die Prince zijn ghemeynte ontlast,
Daermen onderhout goede politie,
Daer niemant op d'arme en braggeert, noch en brast,
Daer die goede ghemeynte daghelijcx wast,
Daermen t'ghemeyn goet wel siet regeren,
Daer moeten die landen wel prospereren.

Daer die ghemeynte haect naer t'Princen lanc leuen,
Daer niemant een ander en bringht in t'verseeren,
Daer orloghe door den peys wordt verdreuen,
Daermen t'slants Priuilegien siet vermeeren,
Daer deught en wijsheyt werdt bemint vanden heeren,
Darmen ghelooue gheeft den goeden raet,
Daer die waerheyt werdt ghehouwen in eeren,
Daer die Prince op gheen flatteerders en slaet,
Daermen den lantman niet en berooft, noch en slaet,
Daer t'volck gheregeert wordt vanden vailianden,
Daer moeten wel prospereren die landen.

[p. 144]

 

Daermen goet recht doet sonder violentie,

 

Daer den Prince hem voor die boosheyt vergrout,

 

Daer elck leuen mach met vrijer conscientie,

 

Daer den Magistraet Gods gheboden hout,

 

Daermen ghetrou dienaers wel betrout,

 

Daermen t'lant niet en siet plucken noch teesen,

 

Daer t'ghemeyn goet bewaert wert van ionck en out,

 

Daermen een ieghelijck God siet vreesen,

 

Daermen voorstaet weduwen en weesen,

 

Daermen wet, oorden, en liefde siet hanteren,

 

Daer moeten die landen wel prospereren.

Prince.

God sal v hier goeden voorspoet gheuen,
Indien ghy zijn gheboden wel bewaert:
En alle natien sullen v aencleuen,
Eest dat ghyse niet te seer en beswaert.
Een discreet Prince van edelder aert,
Moet soo wel den armen als den rijcken
Beschermen: en oock soecken die welvaert
Niet van een deel, maer van ieghelijcken.
Want daer een Prince zijn liefde laet blijcken,
En zijn ghemeynte beschermt vande vijanden,
Daer moeten wel prospereren die landen.

FINIS.